Atyraýda batareıa jutyp qoıǵan balanyń ólimi tekserilýde

ATYRAÝ. QazAqparat – Atyraýda batareıa jutyp qoıǵan bala ólimi boıynsha tergeý júrip jatyr, dep habarlaıdy QazAqparat tilshisi.

«Polıtseıler QR QK 317-baby 3-bóligi «Medıtsına nemese farmatsevtıka jumyskeriniń kásiptik mindetterin tıisinshe oryndamaýy» boıynsha sotqa deıingi tergeý júrgizip jatyr. Qazirgi ýaqytta saraptama taǵaıyndaldy. Іsti tergeý barysy oblys prokýrory men Atyraý oblysy polıtsııa departamenti bastyǵynyń baqylaýynda», - dep habarlady óńirlik PD baspasóz qyzmetinen.

Eske salaıyq, Atyraýda dárigerler teledıdar pýltiniń batareıasyn jutyp qoıǵan bir jasar sábıdiń ómirin qutqara almady. Oblystyq densaýlyq saqtaý basqarmasynyń habarlaýynsha, sábı aýyr jaǵdaıda túsken. Ol qınalyp dem alǵan. Balanyń qandaı da bir zatty jutyp qoıǵany anyqtaldy. Dárigerler ony otasyz ádispen shyǵarmaq bolǵan.

Ókinishke qaraı, jutyp qoıǵan zaty úlkendeý bolǵandyqtan, ol ádis kómektespegen. Otanyń da kómegi tımedi. 11 aılyq náresteniń tynys alýy nasharlap, júrek aqaýynan kóz jumdy.