Atyraýda basseınde tóbeles bolyp, eki adam aýrýhanaǵa jetkizilgen

ATYRAÝ. QazAqparat – Atyraýda sý basseıni keshenindegi tóbelesten zardap shekken eki adam aýrýhanaǵa jetkizilgen. Bul derekti oblystyq polıtsııa departamentiniń baspasóz qyzmeti rastady, dep habarlaıdy QazAqparat tilshisi.

Atyraý qalasynyń «Juldyz» shaǵyn aýdanyndaǵy «Savanna» sý basseıni kesheninde birneshe jigit tóbelesken.

«Jergilikti ýaqytpen saǵat 20:09 shamasynda Atyraý qalalyq polıtsııa basqarmasynyń №2 polıtsııa bólimine shaqyrtý tústi. Polıtsııa qyzmetkerleri oqıǵa ornyna baryp, tekserý júrgizdi. Tekserý kezinde 2007 jylǵy jasóspirimge 22 jastaǵy jigittiń tıiskeni anyqtaldy. Jasóspirim qutqarýshylardyń birine shaǵym aıtqan. Sodan soń 2001 jylǵy jigit pen 18 jastaǵy qutqarýshynyń arasynda tóbeles bolǵan», - dep habarlady departamenttiń baspasóz qyzmeti.

Tóbelestiń saldarynan 2001 jáne 2005 jylǵy eki adam túrli dene jaraqatymen oblystyq aýrýhanaǵa jetkizilgen. Osyǵan baılanysty 1993, 1994 jáne 1995 jylǵy kúdiktilerge qatysty QR Qylmystyq kodeksiniń 293-babynyń 2-bóligimen tergeý amaldary júrip jatyr.

Eske sala ketelik, budan buryn Atyraýda restobarda boıjetkendi urǵan kúzetshilerge qatysty tergeý bastalǵanyn habarlaǵan bolatynbyz. Restobardyń kúzetshileri ózderimen tanysýdan bas tartqan boıjetkenge qol jumsaǵan.

«Kúzetshiler telefonmen sóılesýge shyqqan meni qaıtadan kirgizbeı qoıdy. Olar maǵan kúsh kórsetti. Betimnen birneshe ret uryp, jerge qulatty. Sol kezde meni urǵan kúzetshi basymnan tepti. Polıtsııaǵa shaǵym túsirdim. Biraq, vıdeojazbaǵa eki kúnnen keıin ǵana qol jetkizdik», - dep jazdy zardap shekken boıjetken.