Atyraýda balyqshylar Jaıyqtan salmaǵy 150 keli tartatyn qortpa balyǵyn aýlady

ATYRAÝ. QazAqparat – Atyraýda «Amangeldi» óndiristik kooperatıviniń balyqshylary Jaıyq ózeniniń tómengi saǵasynan salmaǵy 150 keli tartatyn qortpany ustady, dep habarlaıdy QazAqparat.

Seriktestiktiń balyq aýlaý brıgadasyna jetekshilik etetin tájirıbeli balyqshy Ómirzaq Ázbergenovtiń aıtýynsha, bekire tuqymdas alyp balyq 29 naýryzda keshkisin aýǵa túsken. Balyqshylar ony bekire tuqymdas balyqtar shabaǵyn ósirý jónindegi memlekettik tapsyrys aıasynda aýlaǵan. Balyq Jaıyq-Atyraý bekire shabaǵyn ósirý zaýytyna jetkizilgen.

«Bekire tuqymdas qortpanyń salmaǵy – 150 keli, uzyndyǵy – 2 metr 44 sm. Bizdiń mamandar ýltradybystyq skanerdiń kómegimen bekireniń analyq ekeni, qara ýyldyryǵy baryn anyqtady. Qara ýyldyryǵy bar balyq zaýyttyń toǵanynda bolady. Odan jasandy jolmen qara ýyldyryq alynady. Sodan soń ony Kaspıı teńizine – tabıǵı ortaǵa qaıta jiberemiz» -deıdi zaýyt dırektory Ǵılman Sársemalıev.

Eske sala ketelik, budan buryn bıyl kóktemde Atyraý balyqshylary 13 myń tonnaǵa jýyq balyq aýlaıtynyn habarlap edik.