Atyraýda balyq qorǵaý zańnamasyn buzǵandarǵa 20 mln teńgeden astam aıyppul salyndy
22:16, 21 Qazan 2020
ATYRAÝ. QazAqparat –Bıyl Atyraý oblysynda balyq qorǵaý zańnamasyn buzǵandarǵa 20 mln teńgeden astam aıyppul salyndy, dep habarlaıdy QazAqparat.
Oblystyq balyq sharýashylyǵy basqarmasynyń basshysy Artýr Sádibekulynyń aıtýynsha, balyq resýrstaryn qorǵaý maqsatynda polıtsııa men shekara qyzmetiniń kúshimen brakonerlikpen kúreske basa mán berilgen.
«Bıyl brakonerlikke qarsy pármendi jumystardyń nátıjesinde balyq qorǵaý zańnamasyn buzǵan 1 886 derek anyqtaldy. Onyń ishinde 1 050 adam ákimshilik jaýapkershilikke tartylyp, 5 qylmystyq is qozǵaldy. Sondaı-aq, balyq qorǵaý zańnamasyn buzýshylarǵa 20 mıllıon 724 myń teńge kóleminde ákimshilik aıyppul salyndy. Bul baǵyttaǵy jumystar áli de jalǵasýda», - dedi Artýr Sádibekuly.
Eske sala ketelik, budan buryn Atyraý turǵyny 625 keli bekiremen ustalǵanyn habarlaǵan edik.