Atyraýda balyq aýlaý maýsymy bastaldy

ATYRAÝ. QazAqparat - Atyraýda Jaıyq ózenindegi muzdyń tolyqtaı erýine baılanysty, óndiris kooperatıvteriniń balyqshylary balyq aýlaý maýsymyn bastady, dep habarlaıdy QazAqparat.

Balyq aýlaý jumystaryna birinshi bolyp «Amangeldi» JShS kásipornynyń brıgadasy shyqty.

Atyraý oblystyq orman jáne janýarlar dúnıesin qorǵaý ınspektsııasy (balyq ınspektsııasy) jetekshisiniń orynbasary Arman Moldashevtyń aıtýynsha, osy JShS balyqshylary ózenniń tómengi jaǵynda «Zolotenok» jáne «Tómengi Dambadaǵy» eki baǵytta balyq aýlaı alady. Úsh kún boıy (12 naýryzdan 14 naýryzǵa deıin) «Amangeldi» JShS balyqshylary belgili bir túrdegi 12 tonnadan astam balyqty ustady: «Zolotenok» ýchaskesinde 5,426 keli, «Tómengi Damba» ýchaskesinde - 7,153 keli.

Negizinen, aýlanǵan balyqtardyń arasynan qarakóz, sazan, taban, jaıyn, jáne qylyshbalyqtardyń bar ekeni baıqalady.