Atyraýda balalar úıinen taǵy shý shyqty: Tárbıelenýshilerge ýnıtazdaǵy sýdy májbúrlep ishkizgen

ATYRAÝ. QazAqparat – Atyraýda «Shańyraq» balalar aýylyndaǵy daýǵa baılanysty tergeý bastaldy, dep habarlaıdy QazAqparat tilshisi.

Bıyl «Shańyraq» balalar aýylyna qatysty álsin-álsin daý týyndap tur. Endi munda balalardy dárethana sýyn ishýge májbúrlegeni týraly aqparat tarady.

Áleýmettik jelide osy jaıly vıdeo tarady.

«Atyraý qalalyq polıtsııa basqarmasynyń qyzmetkerleri «Shańyraq» balalar aýylyna qatysty jarııalanǵan derek boıynsha QR Qylmystyq kodeksiniń 140-babynyń 2-bóligimen (kámeletke tolmaǵan adamdy tárbıeleý jónindegi mindetterdi oryndamaý) tergeý amaldary júrgizilip jatyr. Ózge aqparat QR Qylmystyq-protsestik kodeksiniń 201-babyna sáıkes jarııalanbaıdy», -dep málim etti oblystyq polıtsııa departamentiniń baspasóz qyzmetinen.

Eske sala ketelik, buǵan deıin Atyraýda balalar aýylynyń dırektory jumysynan shettetilgen edi.

Atyraý oblystyq bilim basqarmasy basshysynyń buıryǵymen otbasylyq úlgidegi «Shańyraq» balalar aýylynyń dırektory Gúlsara Botataeva atqaratyn qyzmetinen tergeý júrgizý kezinde ýaqytsha shettetilgen.

Al, jaqynda áleýmettik jelide Nurdáýlet esimdi balaǵa qatysty vıdeo júkteldi.

Osyǵan baılanysty oblys ákiminiń orynbasary Jasulan Bısembıev pikir bildirdi.

Atyraý oblysy ákiminiń orynbasary Jasulan Bısembıevtiń aıtýynsha, Qazaqstan Prezıdenti janyndaǵy bala quqyqtaryn qorǵaý jónindegi ýákil Dınara Zákıevamen birge otbasy úlgisindegi «Shańyraq» balalar aýylyndaǵy jaǵdaı zerdelengen.

«Túıgen oıym – sońǵy kezde áleýmettik jelide talqylanyp jatqan jaıttar ujymda buryn qyzmet etip ketken jumysshy men burynǵy basshy arasyndaǵy kelispeýshiliktiń nátıjesi. Sonyń saldarynan balalar zardap shegip otyr. Jelide jarııalanǵan túrli jazbalardan eki tarap ózin aqtap alýǵa tyrysyp jatqanyn kórýge bolady. Balany ózine tartyp, túrli vıdeo taratýdyń artynda balanyń quqyǵyn shekteý máselesi tur. Mundaǵy balalar – memlekettiń erekshe qorǵaýyndaǵy balalar. Sondyqtan balalardyń quqyǵyn qorǵaýǵa arnalǵan barlyq shara qabyldanatyn bolady. Oǵan qosa, áleýmettik jelide taraǵan jaıttar balalardyń ózderin qatty alańdatyp, bolashaǵyna keri áseri tıetinin oılap otyrǵanyn baıqadym», -dep habarlady Jasulan Bısembıev.