Atyraýda balalar úıindegi uryp-soǵý deregine baılanysty tergeý bastaldy
Oblystyq polıtsııa departamenti baspasóz qyzmetiniń málimetinshe, áleýmettik jelide jarııalanǵan balalar úıi tárbıelenýshilerin urý deregine baılanysty sotqa deıingi tergeý bastalǵan.
«Áleýmettik jelide taralǵan balalar úıindegi derekterge qatysty QR Qylmystyq kodeksiniń 140-baby 1 bóligimen (Kámeletke tolmaǵan adamdy tárbıeleý jónindegi mindetterdi oryndamaý) sotqa deıingi tergeý amaldary júrgizilip jatyr. Ózge aqparat QR Qylmystyq-protsestik kodekstiń 201-babyna sáıkes jarııalaýǵa jatpaıdy», - dep málim etti departamenttiń baspasóz qyzmeti.
Budan buryn áleýmettik jeli qoldanýshysy Dına Tańsári Atyraýdaǵy «Shańyraq» balalar úıinde tárbıelenýshiler soqqyǵa jyǵylatyny týraly jazba qaldyrǵan.
«Balany urǵan. Ol bul týraly balalarǵa arnalǵan senim telefonyna habarlaǵan. Komıssııa kelip, eshqandaı zań buzýshylyq tappaıdy. Bul az bolǵandaı, komıssııa dırektordyń ózi balalar úıin tekserýi kerek dep habarlaıdy. Komıssııa balalardyń shaǵymdaryn múldem elemeıdi. Bes jasar qyzdy da urǵan», - dep jazdy ol.
Eske sala ketelik, budan buryn Atyraýda arnaıy balabaqshada erekshe balany qorlaý deregine baılanysty tergeý bastalǵanyn habarlaǵan bolatynbyz. Áleýmettik jelide Atyraýdaǵy jeke balabaqshanyń qyzmetkeri úsh jasar balany qorlaǵany týraly vıdeo jarııalanǵan edi. Keıin bul derekke baılanysty tergeý QR Qylmystyq kodeksiniń 140-baby 2-bóligimen (Kámeletke tolmaǵan adamdy tárbıeleý jónindegi mindetterdi oryndamaý) sotqa deıingi tergeý amaldary júrgizildi.
Al, balabaqsha qyzmetkeri jumystan shyǵyp ketken.