Atyraýda balalar tym kóp jep qoıǵan energetıkalyq qospasy bar untaq tekseriledi

ATYRAÝ. QazAqparat – Atyraýda oqýshylar energetıkalyq qospasy bar untaq satyp alyp, mólsherden tys paıdalanǵan. Ata-analardyń suraýymen untaq saraptamaǵa jiberiledi, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetinshe, Atyraý qalasyna qarasty selolyq okrýgtiń birinde mektep oqýshylaryna energetıkalyq qospasy bar untaq satylǵany anyqtalǵan.

«Atyraý qalalyq polıtsııa basqarmasy 4 qazanda sabaqtan oralǵan 4-synyp oqýshysynyń telefonyndaǵy WhatsApp jelisine kelgen habarlamaǵa baılanysty tekserý júrgizdi. Zańdy ókilderiniń qatysýymen 4-synyp oqýshylarynan jaýap alynyp jatyr. Mektep mańyndaǵy beınekameralar tekserilip, kúdik týdyrǵan sol bilim ordasynyń 9-synyp oqýshylary anyqtaldy. Oqýshylar mektep janyndaǵy dúkennen quramynda energetıkalyq qospasy bar untaqty satyp alyp, artyq mólsherde paıdalanǵany anyqtaldy. Ata-analardyń suraýy boıynsha energetıkalyq untaqty saraptamaǵa jiberý máselesi qaralyp jatyr», -dep habarlady departamenttiń baspasóz qyzmeti.

Sondaı-aq, mekteptiń joǵary synybynda oqıtyn oqýshylar kishkentaı balalardan aqsha surap, álimjettik kórsetedi degen aqparat tekserilip jatyr.

Eske sala ketelik, buǵan deıin Atyraý oblysynda balabaqsha múlkin talqandaǵan jasóspirimder kamera arqyly anyqtalǵanyn habarlaǵan bolatynbyz.

Jylyoı aýdanynyń ortalyǵy – Qulsary qalasynda mektep jasyndaǵy jasóspirimder «Qyzǵaldaq» balabaqshasyna jasyrynyp kirgen. Olar balabaqshadaǵy oıynshyqtar men gúlderdi shashyp, astan-kesteńin shyǵarǵan.

Osy derekke qatysy bar 9 jasóspirim ustaldy. Olar – 6-7-synypta oqıtyn oqýshylar.