Atyraýda bala kezinde kontslager tutqynynda bolǵan keıýana daýys berdi
Atyraý qalasyndaǵy «APEC PetroTechnic» kolledjinde ornalasqan №90 ýchaskelik saılaý komıssııasyny músheleri Ekaterına Absatyrovanyń úıine saılaý bıýlleteni men jáshigin alyp bardy.
«Meniń balalyq shaǵym soǵys jyldarymen tuspa-tus keldi. Otbasymyzben kontslager tutqyny boldyq. Tutqyndaǵy kezderim áli de túsime enedi. Qıyndyqty jeńýge tyrystyq. Soǵystan keıingi beıbit ómirdi kórdim. Mine, búgin men de eldiń keleshegi úshin daýys berdim. Qazaqstannyń órkendeı berýi úshin úlesimdi qostym. Elimizde birlik, yntymaq bolsyn. Beıbit ómirge eshteńe jetpeıdi», -deıdi kontslager tutqyny bolǵan keıýana.
Ol 1941 jyly áke-sheshesimen, baýyrlarymen birge kontslagerge túsken. Keıin 1944 jyly tutqynnan bosap shyqqan. Atyraýdyń týmasy Vagaf Absatyrovqa 1950 jyly turmysqa shyǵyp, 1968 jyly munaıly shaharǵa kóship kelgen.
«Meniń bir ǵana tilegim bar. Bul – beıbit ómir. Budan bylaı soǵys órti tutanbaǵanyn, elimiz aman, jurtymyz tynysh bolǵanyn qalaımyn. Búgingi urpaq joǵary bilim alyp, qıyndyqsyz, baqýatty ómir súrse eken», -deıdi Ekaterına Absatyrova.
Qazir ol 2 nemere, 1 shóbere súıip otyr.
Eske sala ketelik, buǵan deıin Qazaqstannyń Eńbek Eri Ilıa Jaqanov Táýelsizdiktiń yrysy men baqyty keler urpaqqa jaıly bolsa eken degen tilegin bildirgen bolatyn.