Atyraýda Baqytgúl Hamenovanyń apellıatsııalyq shaǵymy qarala bastady

ATYRAÝ. QazAqparat – Atyraý oblystyq sotynda óńir ákiminiń burynǵy orynbasary Baqytgúl Hamenovanyń isine qatysty apellıatsııalyq shaǵym qaralyp jatyr, dep habarlaıdy QazAqparat tilshisi.

«Búgin, 20 aqpanda Baqytgúl Hamenovanyń isine qatysty apellıatsııalyq shaǵymdy qaraý bastaldy. Appelıatsııalyq shaǵym oblystyq sottyń qylmystyq ister jónindegi sot alqasynda qaralýda», - dep málim oblystyq sottyń baspasóz qyzmetinen.

Baqytgúl Hamenovanyń isine qatysty sot otyrysy byltyrǵy 11 tamyzda bastalǵan edi. Aıyptaý aktisi 55 betten turdy.

Byltyrǵy 15 qarashada úkim shyǵyp, ol 7 jylǵa sottaldy. Sot oblys ákiminiń burynǵy orynbasaryn QR Qylmystyq kodeksiniń 366-baby 3-bóliginiń 2-tarmaǵymen (Іri kólemde para alý) kináli dep tanydy.

«Sot Baqytgúl Hamenovanyń qabyldaǵan antty buzý arqyly qylmys jasaǵanyn jazany aýyrlatatyn jaǵdaı dep tanydy. Jeńildetetin mán-jaı retinde jas balalarynyń bary eskerildi. Sottalýshyǵa ómir boıyna memlekettik qyzmette laýazymdardy atqarýǵa tyıym salý, 7 jyl merzimge bas bostandyǵynan aıyrý jazasy taǵaıyndaldy. Eki jas balasynyń bolýyna baılanysty QR Qylmystyq kodeksiniń 74-baby 1-bóligine sáıkes jazany óteý merzimi 3 jylǵa keıinge qaldyryldy», - delingen bolatyn sot úkiminde.

Sonymen qatar B.Hamenova «Qurmet» ordeninen aıyryldy. Ol sot zalynan bosatyldy.

Keıin eks-sheneýnik sot úkimine appelıatsııalyq shaǵym túsirgenin jazǵan edik.

«Atyraý qalasynyń №2 sotyna B.Hamenovadan, onyń advokaty I.Vranchevtan, Ý.Adamov pen onyń advokaty K.Adamovadan jáne A.Rysqalıevtyń advokaty N.Jolbolovtan apellıatsııalyq shaǵymdar túskenin habarlaımyz», - dep habarlaǵan edi Atyraý oblystyq sotynyń baspasóz qyzmetinen.