Atyraýda avtokólik kontrabandasymen aınalysqan destrýktıvti dinı aǵym ókili ustaldy
Bul týraly oblystyq polıtsııa departamentiniń baspasóz qyzmetinen málim etti.
«Ekstremızmge qarsy is-qımyl basqarmasynyń qyzmetkerleri jedel-izdestirý sharalaryn júrgizip, avtokólik kontrabandasymen aınalysqan degen kúdikpen 1989 jylǵy er adamdy ustady. Destrýktıvti dinı aǵymnyń ókili Reseı Federatsııasynan avtokólikterdi kontrabandalyq ádispen tasymaldaǵan. Kúdiktiniń turǵylyqty mekenjaıyn tintý kezinde avtokóliktiń jalǵan memlekettik belgileri, avtokólikti satyp alý-satý kelisim sharttary, senimhattar, Reseı Federatsııasynda tirkelgen avtokóliktiń tólqujaty, jeke adamdardyń jeke kýálikteri, taýarǵa arnalǵan deklaratsııa, «Iphone 13» uıaly telefony men túbirtekter tabyldy», -dep habarlady departamenttiń baspasóz qyzmeti.
Qazir polıtsııa qyzmetkerleri ustalǵan kúdiktige qatysty QR Qylmystyq kodeksiniń 385-baby 2-bóligimen sotqa deıingi tergep-tekserýdi júrgizip jatyr.
Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.
Eske sala ketelik, budan buryn Atyraýda jalǵan jarnamamen 15 adamnyń kóligin jalǵa alǵan alaıaq sottalǵanyn habarlaǵan edik.
Keıin Atyraýda aıyppuly tólenbegen sheteldik tirkeýdegi kólikter arnaıy turaqqa jetkizilip jatqanyn jazdyq.