Atyraýda avtobýs jolaqysyn elektrondy túrde tóleýge bolady

NUR-SULTAN - ATYRAÝ. QazAqparat - Atyraýda qoǵamdyq kólikke jolaqy tóleý 85 paıyz elektrondyq túrde júrgiziledi. Bul týraly búgin Ortalyq kommýnıkatsııalar qyzmetindegi baspasóz máslıhatynda Atyraý oblysynyń ákimi Nurlan Noǵaev aıtty, dep habarlaıdy QazAqparat tilshisi.

Aımaq basshysynyń aıtýynsha, qoǵamdyq kóliktegi jol aqysyna engizilgen saralanǵan tarıf tıimdiligin kórsetken.

«Ótken jyldyń qazan aıynda «Tsıfrly Qazaqstan» memlekettik baǵdarlamasy aıasynda Atyraýda elektrondy bıletteýdiń qanatqaqty jobasy engizildi. 11 qazanda jol aqysyn tóleý júıesin elektrondy nusqaǵa aýystyrý úshin dıfferentsııalanǵan tarıf iske qosyldy. Qazir qoǵamdyq kóliktegi jol aqysyn tóleý 85 paıyz elektrondy túrde júrgiziledi dep senimmen aıtýǵa bolady», - dedi oblys ákimi.

Nurlan Noǵaevtyń sózine qaraǵanda, elektrondyq bıletteý júıesi tıimdiligin kórsetken. Bolashaqta qolma-qol aqshany kóleńkeli aınalymnan shyǵarýǵa, sonymen qatar, jolaýshylar leginiń naqty mólsherin anyqtaýǵa, bıýdjetke salyq túsimin kóbeıtýge, tasymaldaýshylardyń tabysyn arttyrýǵa múmkindik beredi. Al ol óz kezeginde avtoparkterdiń avtobýstar quramyn, materıaldyq-tehnıkalyq bazasyn jańartýyna, jolaýshylar tasymaly salasyndaǵy mamandardyń eńbekaqysyn, qyzmet kórsetý deńgeıin kóterýge jol ashady.

Aımaqta qoǵamdyq kólik qatynasyn damytýdyń 2020 jylǵa deıingi tujyrymdamasy iske asyp jatyr. Baǵdarlama aıasynda Atyraýda 160 jańa avtobýs satyp alyndy. Keler jyly taǵy 170 dana avtokólik alynady. Olar qazir Semeı qalasynda qurastyrylyp jatyr. Búginde Atyraý qalasynyń 160 myń turǵyny qoǵamdyq kólikpen qatynaıtyn bolsa, sonyń 120 myńy jolaqyny karta arqyly tóleıdi.