Atyraýda aýyl mektebiniń oqýshylary robot, dron qurastyryp jatyr
Oblystyq bilim basqarmasy baspasóz qyzmetiniń málimetinshe, Qyzylqoǵa aýdanyndaǵy Saǵyz orta mektebinde STEM zerthanasy bar. Qazir onda 5-11 synypta oqıtyn 30 oqýshy qosymsha dáris alady.
«Bizdiń zerthanada oqýshylar qurastyrǵan dron ádettegideı áýede ushady. Tipti sý betinde júzip, vıdeo túsiredi. Dronnyń áýede ushý jyldamdyǵy sekýndyna – 1,5 metr. Al sý betinde sekýndyna 2,5 metrge deıin júzedi. Ázirge synama túrinde qurastyrylǵan dronnyń qýaty 6 mınýtqa jetedi. Keıin qaıta qýattaýǵa bolady. Sonymen birge, oqýshylar aǵash stanogymen, 3D noýtbýkpen jumys isteýdi úırenýde» -deıdi STEM zerthananyń laboranty Láıla Shyńdybaeva.
Onyń aıtýynsha, zerthanada joǵary synyptyń oqýshylary arnaıy baǵdarlama júktelgen 3D prınterdiń kómegimen telefon tireýishin, qumyralar men erekshe formattaǵy Abaı kitabyn, breloktar, medaldar jasap shyǵarǵan.
Sondaı-aq, oqýshylar STEM zerthanada úsh túrli fýnktsııa atqaratyn robottar jasaǵan. Máselen, Mbot roboty kedergilerden ózdiginen burylý arqyly óte alady. Ekinshi robot áýenmen qozǵalady. Úshinshi robot baǵdarlamamen arnaıy syzylǵan syzbalar kómegimen júredi.
«Bul zarthana matematıka, ınjenerııa baǵytyndaǵy osy zamanǵy tehnologııalyq izdenisterge baǵyttalǵan. Joǵary synyp oqýshylary robottardy qurastyrady. Al, tómengi synyp oqýshylary dron, robot qurastyrýdyń tásilderin úırenip jatyr» - deıdi Saǵyz orta mektebi dırektorynyń mindetin atqarýshy Meıramgúl Aıaǵanova.
Bir ereksheligi, aýdandaǵy ózge mektepterde mundaı STEM zerthana joq. Bul mekteptegi zerthana bıylǵy qańtarda iske qosylǵan. Atalǵan mekteptiń hımııa pániniń muǵalimi Aqynta Bısembıeva byltyr respýblıkalyq ǵylymı jobalar baıqaýyna qatysyp, jeńimpaz atanǵan. Júldege utyp alǵan zerthanany ózi eńbek etetin mektepke ornalastyrǵan.
Eki jyl buryn ashylǵan Saǵyz orta mektebinde 424 oqýshy oqıdy. Munda kadet synyby, óndiristik sheberhanalar, tigin tsehy, gımnastıka ortalyǵy men TIR alańy bar. Oqýshylar shyǵarmashylyǵyn damytý maqsatynda bilim ordasynda 16 úıirme men 4 klýb ashylǵan.. Sonyń biri – bı úıirmesi.
«Dáris klassıka, estrada jáne ulttyq bı baǵytynda ótedi. Úıirmege qatysyp júrgen oqýshylardyń onlaın túrde ótip jatqan «Jaryq juldyz» konkýrsynda shoqtyǵy bıik tur» - deıdi bı úıirmesiniń jetekshisi Baqyt Qoıshyǵalı.
Eske sala ketelik, atyraýlyq oqýshylardyń ǵylymı jumysy halyqaralyq jınaqqa engenin jazǵan edik.