Atyraýda aýrýhana dırektory kásipkerdiń jumysyna aqsha aýdarmaı qoıǵan

ATYRAÝ. QazAqparat – Atyraý oblysynda aýdandyq aýrýhana dırektory kásipkerdiń qyzmetine 6 mln teńge aýdarýdan bas tartqan, dep habarlaıdy QazAqparat.

Sybaılas jemqorlyqqa qarsy is-qımyl agenttiginiń Atyraý oblystyq departamentine Qurmanǵazy aýdanynda turatyn kásipker shaǵymmen júgingen.

«Kásipker Qurmanǵazy aýdandyq aýrýhanasynyń klımattyq jabdyqtaryna tehnıkalyq qyzmet kórsetken. Alaıda, aýdandyq ortalyq aýrýhananyń basshylyǵy kásipkerge bul qyzmeti úshin shamamen 6 mln teńge kóleminde qarjy aýdarýdan bas tartqan. Osyǵan baılanysty kásipker bizdiń departamentke shaǵym túsirdi. Osyǵan baılanysty departamenttiń qyzmetkerleri jedel tekserý júrgizdi. Sonyń nátıjesinde Qurmanǵazy aýdandyq aýrýhanasynyń basshylyǵy kásipkerdiń alýy tıis qarjysyn tolyǵymen tóledi», -dep habarlady óńirlik departamenttiń baspasóz qyzmeti.

Qurmanǵazy aýdandyq aýrýhanasynyń dırektory tarapynan kásipker qyzmeti úshin qarjy aýdarýdan bas tartý ekinshi ret qaıtalanǵan.

Sol sebepten Sybaılas jemqorlyqqa qarsy is-qımyl agenttiginiń Atyraý oblystyq departamenti tıisti organdarǵa usynys bergen.

Ese sala ketelik, budan buryn Atyraý oblysynda kedergige tap bolǵan kásipkerler Antıkorǵa shaǵymdanǵanyn habarlaǵan edik.

«Qurmanǵazy aýdanyndaǵy kásipkerge ortalyq aýrýhana basshylyǵy azyq-túlik jetkizgeni úshin 1 mıllıonnan astam teńgeni tóleýden bas tartqan. Tekserý júrgizilip, aýrýhanadan kásipkerdiń esep shotyna aýdaryldy», -dep málim etken edi departament basshysynyń ýaqytsha mindetin atqarýshy Erulan Serikqalıev.