Atyraýda aýlanǵan balyqtyń 80 paıyzy eksportqa shyǵarylyp jatyr
«Óńirdiń kúrdeli klımattyq jaǵdaıyna qaramastan, aýyl sharýashylyǵyn damytýǵa erekshe kóńil bólip kelemiz. Bul salada 26 mlrd teńgege jýyq ónim óndirildi. Tuşy sý tapshylyǵyna qaramastan, iri qara mal basy 4, jylqy 9,5, túıe 3, qoı men eshki 2 paıyzǵa artty. Aýyl sharýashylyǵy ónimderin óndirýshilerdi de qarjylaı qoldaý úshin jyl saıyn qarajat bólinýde. Bıyl osy maqsatqa 3,1 mlrd teńge qarastyryldy», - dedi oblys basshysy Ortalyq kommýnıkatsııalar qyzmetinde brıfıng barysynda.
Onyń atap ótýinshe, áleýmettik mańyzy bar azyq-túlik taýarlarynyń baǵasyn turaqtandyrý boıynsha turaqty jumystar jasalýda. Óńirde 1 mlrd 100 mln teńgeniń ústinde taýarlyq-qarjylyq turaqtandyrý qory qalyptastyryldy. Sonyń aıasynda 755 mln teńge mólsherinde aınalym qory qurylyp, óńirdegi «Ideal» iri saýda jelisimen kelisim jasaldy. Nátıjesinde atalǵan jeliniń 36 saýda núktesinde áleýmettik mańyzy bar azyq-túlik taýarlarynyń 14 túri naryqtan 10-15 paıyzǵa tómen baǵamen satylýda. Sonymen qatar, áleýmettik mańyzy bar azyq-túlik taýarlarynyń baǵasyn turaqty ustaý úshin kásipkerler, taýar óndirýshiler sondaı-aq iri saýda oryndary arasynda 200-den astam memorandým jasalǵan.
«Balyq sharýashylyǵynda da ósim bar. Ótken jyly osy ýaqytta 6,5 myń tonna balyq aýlansa, bıyl 10 myń 150 tonna aýlandy. Onyń 90 paıyzy óńdelip, ónimniń 80% eksporttaldy», - dedi oblys basshysy.