Atyraýda aýany lastaıtyn kásiporyndarǵa tal egetin arnaıy ýchaskeler bekitiledi

NUR-SULTAN. QazAqparat – Atyraý oblysynyń ákimdigi aýany lastaıtyn iri kásiporyndarǵa tal egý úshin arnaıy ýchaskeler bekitpek. Bul týraly Úkimet otyrysynda Mahambet Dosmuhambetov málim etti, dep habarlaıdy QazAqparat tilshisi.

Úkimet otyrysynda Ekologııa, geologııa jáne tabıǵı resýrstar mınıstri Maǵzum Myrzaǵalıev Atyraý oblysynyń ekologııalyq problemalaryn sheshýge baǵyttalǵan Jol kartasy 40 is-sharadan turatynyn jetkizdi.

Onyń ishinde jańa káriz tazartý keshenderin salyp, eskilerin qaıta qalpyna keltirý, «Týhlaıa balka» jáne «Kvadrat» kárizdik alańdaryn rekýltıvatsııalaý, kógaldandyrý, Jaıyq ózeniniń basseınin tazartý jáne saýyqtyrý sekildi basqa da mańyzdy sharalar kózdelgen.

Al Atyraý oblysynyń ákimi Mahambet Dosmuhambetov bul jospar sheńberinde naqty qandaı sharalar qarastyrylǵanyn aıtyp berdi.

«Óńirdegi iri munaı-gaz kásiporyndaryn «Lastaýshy qalpyna keltiredi» ustanymyna sáıkes, qorshaǵan ortaǵa keltirgen zalaldyń ornyn toltyrý úshin kógaldandyrý jumystaryna tartý kózdelýde. Birinshi sanattaǵy kásiporyndardyń atmosferaǵa shyǵarǵan 165 myń tonna shyǵaryndylar kóleminiń 86 paıyzyn – 6 iri kásiporyn qurap otyr. Oblys ákimdigi negizgi lastaýshy kózderi bolyp otyrǵan iri kásiporyndarmen kelissózderdi júrgizip, olarǵa tal egý úshin arnaıy jer ýchaskelerin bekitip berý baǵytynda jumystardy atqaryp jatyr. Osyǵan sáıkes qazir qala aımaǵynan orman qory men eldi mekender jerin qosa alyp, ýchaskelerdiń tizbesi jasaqtaldy. Kógaldandyrý jumystarymen qosa alǵanda aýdandardyń barlyq eldi mekenderinde júrgiziledi. Bul jyl saıyn 100 myńǵa deıin qosymsha kóshet egýge múmkindik beredi», - dedi ol.