Atyraýda aýany lastaǵan eki kásiporynda tekserý júrip jatyr

ASTANA. QazAqparat – Atyraý qalasynyń aýasyn lastaǵan munaı óńdeý zaýyty men KPI kásipornynda tekserý júrip jatyr. Bul týraly Ekologııalyq retteý jáne baqylaý komıteti tóraǵasynyń mindetin atqarýshy Aıdar Abdýalıev málim etti, dep habarlaıdy QazAqparat tilshisi.

«Ótken aptada Atyraý oblysynda birqatar oqıǵa (ekologııalyq) boldy. Qorshaǵan ortanyń lastaný sebebiniń biri – Aqjaıyq tabıǵaı rezervatyndaǵy órt. Ekinshisi – Atyraý munaı óńdeý zaýytyndaǵy apat. Dál sondaı apat «KPI» óndirisinde de tirkeldi.

Atyraýdyń aýasyn kúkirtsýtekpen lastap turǵan negizgi kózder – jurt «Týhlaıa Balka» jáne «Kvadrat» dep atap ketken nysandar. Jel osy nysandarda býlanǵan shyǵaryndylardy qalaǵa jetkizgen. Ekologııa departamenti synamalar alyp, kúkirtsýtektiń normadan asyp ketkenin anyqtady», - dedi Aıdar Abdýalıev.

Aıtýynsha, materıaldar Atyraý oblysy boıynsha santıarııalyq-epıdemıologııalyq qadaǵalaý basqarmasyna joldanǵan.

Al, Atyraý munaı óńdeý zaýytynda 8 sáýirden beri tekserý júrip jatqany belgili boldy.

«KPI» kásipornyndaǵy jospardan tys tekserý kezinde gazdyń aýada ruqsatsyz órtengeni anyqtalǵan. Bul fakti boıynsha da tekserý júrip jatyr.