Atyraýda ata-ana qamqorlyǵynsyz qalǵan 11 bala úı kezegine qoıylmaǵan
Bul fakti Atyraý qalalyq prokýratýrasy júrgizgen tekserý kezinde anyqtalǵan.
«Prokýrorlyq qadaǵalaýdyń basym baǵyttarynyń biri – kámeletke tolmaǵandar quqyǵy men zańdy múddesin qorǵaý. Jetim jáne ata-anasynyń qamqorlyǵynsyz qalǵan balalar Qazaqstan Respýblıkasynyń tıisti zańnamasyna sáıkes turǵyn úımen qamtamasyz etilýi tıis. Zańnamada ata-anasynyń qamqorlyǵynsyz qalǵan jetim balalarǵa kommýnaldyq turǵyn úı qorynan turǵyn úıdiń jalpy sanynyń keminde 20 paıyzy bólinetini kózdelgen. Alaıda, jergilikti ýákiletti organdardyń áreketsizdiginen jetim jáne ata-ana qamqorlyǵyna alynbaǵan 11 bala turǵyn kezegine alynbaǵany anyqtaldy. Olar jasóspirimder balalar úıinen shyǵarylǵan kezde zańǵa sáıkes turǵyn úısiz qalýy múmkin. Sol sebepten, prokýrorlyq den qoıý sharalarynan soń 11 adam tıisti esepke alyndy», -dep habarlady qalalyq prokýratýranyń baspasóz qyzmeti.
Eske sala ketelik, budan buryn Atyraý oblysy mektepterinde sabaqaralyq úzilis uzaqtyǵy negizsiz qysqarǵanyn habarlaǵan edik.
Jylyoı aýdanynyń prokýratýrasy jalpy bilim berý mekemeleriniń oqýshylary úshin sabaqtar arasyndaǵy úzilisterdiń uzaqtyǵyn retteıtin zańnamanyń saqtalýyna taldaý júrgizgen.
«Aýdan mektepterinde úzilisterdiń uzaqtyǵy negizsiz qysqarǵany anyqtaldy. Bul oqýshylardyń sabaqtar arasynda demalý quqyǵyn shektedi. Prokýrorlyq den qoıý sharalarymen aýdandyq bilim bólimi 863 synyp úshin sabaq kestesin túzetti. Osylaısha, aýdandaǵy jalpy bilim beretin 20 mektepte 18 481 oqýshynyń quqyǵyn qalpyna keltirildi», -dep habarlady oblystyq prokýratýranyń baspasóz qyzmeti.