Atyraýda ár kúni túrli is-shara ótetin etnosaıabaq ashyldy

ATYRAÝ. QazAqparat – Atyraýda qalasynyń irgesindegi Erkinqala aýylyna barar jolda ár kúni túrli is-shara ótetin etnosaıabaq ashyldy, dep habarlaıdy QazAqparat.

Etnosaıabaqty kásipker Gúljan Qozekesheva «Nurly tal» dep ataǵan. Onyń aıtýynsha, erekshe parkti ashý ıdeıasy 5 jyl buryn týyndaǵan.

Ákimdik etnosaıabaq úshin 2 gektar jer bólgen. Jobanyń quny – 280 mln teńge. Munda kelýshiler qolóner buıymdaryn tamashalaı alady. Altybaqan teýip, ulttyq taǵamdar meıramhanasynan dám tatady.

«Biz kún saıyn ártúrli is-shara ótkizemiz. Máselen, seısenbini qorshaǵan ortany qorǵaýǵa arnaýdy kózdedik. Bul kúngi ótetin sharalar tabıǵattyń tazalyǵyn saqtaýǵa baǵyttalady. Sársenbidegi baǵdarlamanyń barlyǵy balalarǵa arnalady. Beısenbi kúni qazaqstandyq taýar óndirýshilerdiń jármeńkesi ótedi. Jumada qala turǵyndary men qonaqtary úshin konkýrstar, kontserttik baǵdarlamalar usynylady. Senbi – otbasylyq kún, jeksenbi – jastar kúni», - deıdi etnosaıabaq dırektory Gúljan Qozekesheva.

Onyń aıtýynsha, parkte jergilikti qolónershilerge óz taýaryn satýǵa oryn berilmek. Sondaı-aq tórt túlik kórmesin uıymdastyrý josparlanyp otyr.

«Qazir jergilikti kásipkerlermen kelissóz júrgizip jatyrmyz. Óz kásibin jańadan bastaǵandar men jas qolónershilerge qoldaý kórsetemiz. Olar etnosaıabaqta ótetin jármeńkelerge qatysa alady», - deıdi etnosaıabaq dırektory.

Eske sala ketelik, budan buryn Atyraýda úkimettik emes uıymdar jobalarynyń jármeńkesi ótkenin jazǵan edik.