Atyraýda aptap ystyq: Energetıkalyq kásiporyndar kúsheıtilgen rejimde isteýde

ATYRAÝ. QazAqparat - Búgin Atyraý oblystyq óńirlik kommýnıkatsııalar qyzmetiniń brıfınginde aımaqtyń energetıkalyq kásiporyndary Atyraýdaǵy elektr qýatynyń óship qalýyna qatysty túsinik berdi, dep habarlaıdy QazAqparat tilshisi.

«Atyraý JEO» AQ prezıdenti Aıvar Rahmanovtyń deregi boıynsha, mundaı jaǵdaı tek Atyraýda emes, Mańǵystaý oblysynda da bolǵan.

«Atyraý jáne Mańǵystaý oblystarynda aýa temperatýrasynyń kóterilýine baılanysty Atyraý JEO jabdyqtary durys jumys istep turǵan joq. Elektr energııasy generatsııasynyń múmkindigi saǵatyna 260 megavatty quraıdy. Ótken aptada energııa tutynýdyń kúrt ósýine baılanysty barynsha óndirýge májbúr boldyq. Qazir ol májbúrli shara. Jabdyqtardyń qajetinshe sýytylmaýy saldarynan avtomatıka iske qosylyp, salqyndatý kezinde jaryqty sóndirip jatyr. Bul da májbúrli shara. Biz ony qoldanbasaq, jabdyq isten shyǵýy múmkin. Eń bastysy, apattyq jaǵdaı bolǵan joq, barlyǵy shtattyq rejimde jumys istep tur», - dedi A.Rahmanov.

KEGOC AQ Batys bólimshesiniń dırektory Konstantın Chernohaevtyń pikirinshe, aptap ystyqqa baılanysty elektr energııasyn tutyný kólemi artqan.

Energetıkter osy máseleni sheshý úshin barlyǵyn istep jatqandaryn aıtty.