Atyraýda alıment óndire almaǵan 8 myńnan astam turǵyn shaǵymdandy

ATYRAÝ. QazAqparat – Atyraýda jeke sot oryndaýshylaryna qaryzdy qaıtarý týraly 146 myń shaǵym túsken. Onyń ishinde, alıment óndirýge baılanysty 8 myń 500 shaǵym bar, dep habarlaıdy QazAqparat tilshisi.

«Óńirlik palataǵa jyl basynan beri 146 475 shaǵym tústi. Onyń ishinde, alımentti óndirý úshin 8 myń 500 shaǵym bar. Barlyq shaǵymnyń 60 paıyzy zańdy jáne jeke tulǵalardyń paıdasyna aqsha qarajatyn óndirýge baılanysty bolyp otyr. Osy kezge deıin shaǵymdardyń 45 myńy aıaqtaldy. Al, 28 myń 430 qujat isi aıaqtalýǵa jaqyn. Qalǵan qujattar áli qaralyp jatyr», - deıdi oblystyq jeke sot oryndaýshylary óńirlik palatasy basshysynyń orynbasary Gúldana Qystaýbaeva.

Onyń aıtýynsha, aryzdanýshy sot oryndaýshynyń jumysyna kóńili tolmaǵan jaǵdaıda oblystyq ádilet departamentiniń nemese óńirlik palatanyń kómegine júginýge bolady. Sondaı-aq, aryzdanýshy adilet.gov.kz saıtyna kirip, óziniń JSN-in terý arqyly barlyq qujatty júkteı alady.

«Jyl basynan beri oblystyq ádilet departamenti men óńirlik palata alımentti óndirý baǵytynda jármeńkeler uıymdastyryp, reıdtik sharalar ótkizdi. Jaqynda palatanyń bastamasymen alımentti qasaqana tólemeı otyrǵan boryshkerlerge qatysty memorandýmǵa memlekettik organdar qol qoıdy. Sonyń nátıjesinde bir boryshker qylmystyq jaýapkershilikke tartyldy. Atyraýda alıment óndirý boıynsha arnaıy keńse ashyldy. Bul keńsede tórt sot oryndaýshysy jumysqa tartyldy», - deıdi atqarýshylyq óndiristi qamtamasyz etý bóliminiń basshysy Zarına Tórebaeva.

Ádilet departamentinde «adaldyq alańy» jobalyq keńsesi ashylǵan. Onda departament mamandary kún saıyn qabyldaý júrgizip, alımentti óndirýge qatysty keńes beredi.

Eske sala ketelik, buǵan deıin Atyraýda alǵash ret alıment tólemegen adam qylmystyq jaýapqa tartylyp, sottalýy múmkin ekenin jazǵan edik.