Atyraýda áleýmettik mańyzdy taýarlar naryqtaǵy baǵadan arzanǵa satylady

ATYRAÝ. QazAqparat –Atyraýda áleýmettik mańyzdy taýarlar naryqtaǵy baǵadan 10-15 paıyz arzanǵa satylady, dep habarlaıdy QazAqparat.

Óńirlik kommýnıkatsııalar qyzmetiniń málimetinshe, Atyraýda turaqtandyrý qory azyq-túliktiń tómen baǵada satylýyn qamtamasyz etip otyr. Óıtkeni, oblys ákimi Mahambet Dosmuhambetov tıisti mekemelerge áleýmettik mańyzy bar taýarlardyń baǵasyn kótermeýdi tapsyrǵan.

Bul óńirge azyq-túlik pen kókónis, jemis-jıdek pen taǵamdardyń barlyǵy derlik syrttan ákelinedi. Sondyqtan, jergilikti bılik baǵanyń qymbattamaýyn turaqty baqylaýǵa alǵan. Oblys ákiminiń tapsyrmasyna saı, áleýmettik mańyzdy taýarlardyń baǵasyn turaqtandyrýǵa qatysty qajetti tetikter jasalǵan. Atap aıtqanda, «Atyraý» ÁKK» AQ-men jasalǵan kelisimge sáıkes, áleýmettik mańyzy bar azyq-túliktiń 15 túri saýda núktelerinde tómen baǵada satylyp jatyr.

«Atyraý» ÁKK» AQ memlekettik jobalardy iske asyrý departamentiniń menedjeri Azamat Aıtpaevtyń aıtýynsha, ​«Ideal market» JShS-men bıylǵy mamyrda 400 mıllıon teńgege kelisimshart jasaldy.

«Kelisimshartqa sáıkes, atalǵan seriktestiktiń 36 sýpermarket jelisinde áleýmettik mańyzy zor azyq-túlik oblys ákimdigi bekitken baǵamen satylady. Bul – naryqtaǵy qunynan 10-15 paıyzǵa tómen» -deıdi Azamat Aıtpaev.

Qazir turaqtandyrý qorynda jergilikti kókónis óniminiń 605 tonnasy bar.

«Sondaı-aq jergilikti «Agrofelıks» sharýa qojalyǵynyń qoımasynda 361 tonna kartop, 79 tonna pııaz, 49 tonna sábiz, 114 tonna oramjapyraq saqtalǵan. Barlyq ónim qys mezgilinde «Nasıha», «Kóktem», «Dına», «Saraıshyq» bazarlary arqyly satylymǵa shyǵarylady» -deıdi ​ «Atyraý» ÁKK» AQ memlekettik jobalardy iske asyrý departamenti dırektorynyń mindetin atqarýshy Gúlmıra Meńdalıeva.

Turaqtandyrý qoryndaǵy áleýmettik mańyzdy taýarlar qataryna birinshi surypty bıdaı uny, nan, makaron ónimderi, qaraqumyq, kúrish, kúnbaǵys maıy, sıyr eti, taýyq eti, sút, aıran, sary maı, birinshi sanatty taýyq jumyrtqasy, as tuzy, maılylyǵy 5-9 paıyzdyq irimshik pen kókónistiń birneshe túri engizilgen. Máselen, birinshi surypty bıdaı unynyń kelisi 179 teńgeden, sıyr eti – 1860 teńgeden, taýyq etiniń kelisi 630 teńgeden, nan 80 teńgeden satylady. 3 tonnadan astam ónim satylǵan edi.

Eske sala ketelik, budan buryn Atyraýda aýyl sharýashylyǵy jármeńkesinde 13 tonnadan astam ónim satyldy.