Atyraýda aldaǵy bes jylda kópqabatty 237 eski úı renovatsııadan ótedi
Ákimniń aıtýynsha, bul jumys Atyraý qalasynyń turǵyn úılerin renovatsııalaýdyń 2022-2026 jyldarǵa arnalǵan baǵdarlamasyna sáıkes júzege asyrylady.
«Renovatsııalaý – eski ǵımarattardy tolyǵymen buzyp, jańa nysan salý. Bul jobany iske asyrý kezinde eski turǵyn úı ıeleriniń ómir súrý deńgeıin jańa páterlermen qamtamasyz etý arqyly jaqsartý kózdelip otyr. Mundaı joba munaıly shahardaǵy áleýmettik shıelenisti joıý, Atyraý qalasynyń qurylys sektoryn damytý úshin ınvestıtsııalyq klımat qurýǵa yqpal etedi», -deıdi Meıirim Qalaýı.
Ákimniń deregine qaraǵanda, joba 8 basty baǵytty qamtylǵan. Onyń ishinde qala aýmaǵyndaǵy eski úılerdi joıý, azamattardy jaıly turǵyn úımen qamtamasyz etý, qalanyń sáýlettik kelbetin qalyptastyrý, qurylysqa bıýdjetten tys qarajat tartý tetikterin damytý jáne ózgeleri bar.
«Atyraý qalasynda renovatsııaǵa jatatyn 237 eski úı, 3549 páter bar. Aldaǵy bes jylda sol baspanalardy qurylys kompanııalary qaıta jańǵyrtady. Naqtysynda bir baspanany tolyǵymen buzyp, dál sol jerge jańa nysan turǵyzady. Qurylysty bastar aldynda mekeme turǵyn úıdegi páter ıelerimen kelisimge kelip, olardy jaıly baspanaǵa kóshirýdi mindetine alady. Jumys aıaqtalǵannan keıin, úı ıeleri burynǵy turǵylyqty jerine, biraq jańa baspanaǵa qaıta oralady. Al, qalǵan páterlerdi qurylys kompanııasy satylymǵa shyǵarady», -dep túsindirdi Meıirim Qalaýı.
Atyraý qalalyq qarjy bólimniń basshysy Meıirjan Muqasovtyń málimetine súıensek, baǵdarlama aıasynda eski kóppáterli úılerdiń ıelerin kóshirý turǵyndardyń sanyna qaramastan, páterlerge arnalǵan tehnıkalyq tólqujattarǵa sáıkes, «bólme úshin bólme» qaǵıdaty boıynsha júrgiziledi. Al bólme sanyn kóbeıtkisi keletinder qurylys kompanııasynyń ókilderimen kelisim jasaýy kerek.
«Baǵdarlamany iske asyrý kezinde aýmaqty abattandyrý, kóshe, jol jelisin, turaq keńistigin, qasbet mańyndaǵy aımaqtyń trotýarlaryn salý, aýla jáne kógaldandyrylǵan aýmaqtardy uıymdastyrý memleket esebinen júrgiziledi. Bul jobany iske asyrý Úkimettiń 2019 jylǵy 31 jeltoqsandaǵy №1054 qaýlysymen bekitilgen «Nurly jer» turǵyn úı-kommýnaldyq sharýashylyǵyn damytýdyń 2020-2025 jyldarǵa arnalǵan memlekettik baǵdarlamasynyń negizinde ázirlendi», -deıdi Meıirjan Muqasov.
Onyń aıtýynsha, eski úılerdiń basym bóligi M.Baımuhanov, M.Áýezov, Azattyq, S.Datov kóshelerinde ornalasqan. Atyraý qalasynda 2011-2020 jyldary aralyǵynda 149 úıge kúrdeli jóndeý júrgizilgen. Al, 2012-2022 jyldary jalpy aýdany 34 069 sharshy metrdi quraıtyn 37 úı buzylǵan.
Eske sala ketelik, buǵan deıin sapaly josparlaý standartymen Atyraý qalasyn damytý tujyrymdamasy qalaı iske asatynyn habarlaǵan bolatynbyz.