Atyraýda alaıaqtar Instagram arqyly arzan telefon satamyz dep 11 qalanyń turǵyndaryn aldaǵan
Atyraý oblystyq polıtsııa departamentiniń baspasóz qyzmetinen málim etkendeı, 18 sáýirden beri «Anti-fraud» is-sharasy ótip jatyr.
«Atyraý oblysy polıtsııa departamenti men Taldyqorǵan qalalyq polıtsııa basqarmasynyń kıberqylmysqa qarsy kúres qyzmetkerleri birlesken jedel-profılaktıkalyq is-sharasy kezinde qylmystyq topty ustady. Kúdiktiler Instagram áleýmettik jelisinde jalǵan paraqsha ashyp, Iphone telefonyn alaıaqtyq maqsatpen saýdalaǵan. Qymbat markaly telefondy naryqtaǵy qunynan arzanǵa satyp almaq bolǵan turǵyndar aqshasyn alaıaqtarǵa aýdarǵan. Al, alaıaqtar aqshany qolma-qol shyǵarý arqyly dropperlerge, keıin ózderiniń esepshotyna aýdaryp otyrǵan», -dep habarlady departamenttiń baspasóz qyzmeti.
Alaıaqtarǵa aldanǵan jábirlenýshiler arasynda Semeı, Almaty, Astana, Qaraǵandy, Aqtóbe, Aqtaý, Óskemen, Shymkent, Oral qalalary men Ulytaý, Pavlodar oblystarynyń turǵyndary bar.
Ustalǵan 18 jáne 56 jastaǵy kúdiktiler – Almaty qalasynyń turǵyndary.
«Kúdiktilerden eki IPhone 14 jáne IPhone 12, IPhone 6s , Samsung, noýtbýk, 12 SIM-karta, Beeline modemi, túbirtekter tárkilendi. Jábirlenýshilerge kelgen shyǵyn kólemi 2 mln teńgege jýyq ekeni anyqtaldy. Qazir ustalǵan kúdiktilerge qatysty QR Qylmystyq kodeksiniń 190-babynyń 3-bóligi boıynsha tergeý amaldary júrgizilip jatyr», -dep málim etti departamenttiń baspasóz qyzmetinen.
Ózge aqparat QR Qylmystyq-potsestik kodeksiniń 201-babyna sáıkes jarııalaýǵa jatpaıdy.
Eske sala ketelik, buǵan deıin Atyraýda otyz adamǵa kredıt aldyryp, 40 mln teńgeni qaltasyna basqan alaıaq ustalǵanyn habarlaǵan bolatynbyz.