Atyraýda alaıaq áıel turǵyndardy jer telimin áperem dep aldaǵan

ATYRAÝ. QazAqparat – Atyraý oblysynyń turǵynyn aldaǵan taǵy bir alaıaq ustaldy, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetinshe, 54 jastaǵy alaıaq áıel ózinen úlken turǵynǵa jer telimin alyp berýge ýáde etken.

«Internettegi alaıaqtyqtyń arbaýyna túsetinder qatarynda aýyl turǵyndary da bar. Máselen, 4 qyrkúıekte Maqat aýdanyndaǵy Dossor kentinde turatyn 58 jastaǵy áıel Atyraý qalasynan jer telimin alý úshin alaıaqqa 350 myń teńgesin bergen. Keıin jer telimin almaǵan. Aqshasyn keri qaıtara almaǵan soń alaıaqtyń arbaýyna túskenin bilgen», - deıdi oblystyq polıtsııa departamentiniń bastyǵy, polıtsııa polkovnıgi Qamza Úmbetqalıev.

Onyń aıtýynsha, qazir alaıaqtyq kúdigimen ustalǵan 1967 jylǵy áıelge qatysty QR Qylmystyq kodeksiniń 190-babynyń 1-bóligimen sotqa deıingi tergeý júrip jatyr.

Eske sala ketelik, budan buryn Atyraýda 60 adamdy jumysqa ornalastyrýǵa ýáde bergen alaıaq ustalǵanyn jazǵan edik.