Atyraýda aqshaǵa qunyqqan taksıster ustaldy

ATYRAÝ. QazAqparat – Atyraý qalasynda 17 sáýirden bastap karantın men shekteý talaby kúsheıtilip, taksıster qyzmetine de tyıym salyndy. Degenmen, olardyń aqshaǵa qunyǵyp, jolaýshy tasymaldaıtyndary azaıar emes. Bul týraly oblystyq polıtsııa basqarmasynyń baspasóz qyzmeti málim etti, dep habarlaıdy QazAqparat.

«Polıtsııa qyzmetkerleri tek bir táýlikte (18 sáýir) Atyraý qalasynda 55 quqyq buzýshyny (negizinen avtokólik) ustady. Al, 19 sáýirge qaraǵan túni saǵat 21:00-den keıin jolaýshylar tasymaldaǵan 24 júrgizýshi anyqtaldy.

Onyń ishinde, polıtseıler tún ortasynda «inDriver» qosymshasy arqyly jeke tasymaldaýmen aınalysqan úsh júrgizýshini toqtatty. Úsheýi de saǵat 20:00-ge deıin júzege asyrylatyn azyq-túlik jetkizý tártibin buzyp, jolaýshylar tasymaldaǵan. Olarǵa qatysty QR Ákimshilik quqyqbuzýshylyq týraly Kodekstiń 476-babymen (Tótenshe jaǵdaı rejımin buzý) ákimshilik hattamalar toltyrylyp, sotqa joldandy.

Budan basqa, QR Ákimshilik quqyqbuzýshylyq týraly Kodekstiń 608-babyn buzǵan 3 júrgizýshige de hattama toltyryldy. Olar avtokólikti mas kúıde basqarǵan» -dep habarlady oblystyq polıtsııa departamentiniń baspasóz qyzmeti.

Karantınniń kúsheıtilgen talabyn buzǵan taksıster aqshaǵa qunyǵyp, aqyny óreskel qymbattatyp jibergen. Olar tapsyrys berýshilerge bir mekenjaıǵa jetý úshin 3000-nan 5000 teńge aralyǵynda aqy tóleýdi suraǵan.