Atyraýda ákesi uryp-soǵyp, namaz oqýǵa májbúrlegen 11 jasar qyz polıtsııaǵa júgindi

ATYRAÝ. QazAqparat – Atyraýlyq er adam 11 jasar qyzyn uryp-soǵyp, duǵa jasaýǵa májbúrlegen. Ákesinen zábir kórip, úıinen qashyp ketken jasóspirim kámeletke tolmaǵandardy beıimdeý ortalyǵynda turyp jatyr, dep habarlaıdy QazAqparat.

Bul jaıynda ózin beıimdeý ortalyǵynyń qyzmetkerimin dep tanystyrǵan Dılnaz Ádiljanqyzy áleýmettik jelige jazdy. Onyń aıtýynsha, 11 jasar qyzdyń anasy túrmege túsken.

Bostandyqqa shyqqan soń balalarynan bas tartyp, otbasynan ketip qalǵan.

«Byltyr jasóspirim qyz ájesinen aýrýhanaǵa aparýdy ótingen. Aýrýhana dárigerleri jasóspirimniń denesinen jaraqatty, kógergen daqty, qabyrǵasy synǵanyn anyqtaǵan. Ol kezde bala dárigerlerge eshteńe aıtpaǵan. Al, bıylǵy qańtarda synyptasynyń ákesinen kómek suraǵan. Ol jasóspirimdi polıtsııaǵa jetkizgen. Polıtsııa qyzmetkerleri ákesinen qorlyq kórgen qyzdy kámeletke tolmaǵandardy beıimdeý ortalyǵyna ornalastyrdy», -deıdi Dılnaz Ádiljanqyzy Facebook paraqshasynda.

Qazir psıhologtar qorlyq kórgen jasóspirimmen jumys istep jatyr.

Al polıtsııa qyzmetkerleri QR Qylmystyq kodeksiniń 110-babynyń 2-bóliginiń 1-tarmaǵymen sotqa deıingi tergep-tekserýdi bastady.

Tıisti saraptamalar taǵaıyndaldy. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.

Eske sala ketelik, buǵan deıinAtyraýda 26 áıel men 52 bala otbasylyq zorlyq-zombylyqqa ushyraǵanyn habarlaǵan bolatynbyz.

Al, otbasynda janjal shyǵarǵan 2 myńnan astam atyraýlyq jaýapqa tartyldy.

Keıin jtbasynda janjal shyǵarǵan atyraýlyq úıin órtep, qashyp ketkenin azǵan edik.