Atyraýda aǵaıyndy jasóspirimder Jaıyq ózenine batyp ketti
Atyraý oblystyq Tótenshe jaǵdaılar departamenti qoǵammen baılanys tobynyń málimetinshe, oqıǵa keshe, 13 maýsymda keshki mezgilde bolǵan.
«Keshe Atyraý qalasynyń irgesindegi Geolog eldi mekeniniń tusynda bir top jasóspirimniń Jaıyq ózenine shomylýǵa barǵany anyqtaldy. Olar ózenniń shomylýǵa tyıym salynǵan belgi ornatylǵan jerinde sýǵa túsken. Sol kezde 2007 jáne 2008 jyly týǵan jasóspirimder sýǵa batyp ketken», - dep habarlady departamenttiń qoǵammen baılanys tobynan.
Qutqarýshylar kesheden beri sýǵa batqan aǵaıyndy balalardy izdestirip jatyr. Ázirge nátıje joq.
Búgin, 14 maýsymda izdestirý jumystary qaıta jalǵasty.
Budan buryn Atyraý oblysy sý aıdyndarynda shomylýǵa qaýipti 70 ýchaske bar ekenin habarlaǵan bolatynbyz. Atyraý qalasynda – 17, Inder aýdanynda – 10, Mahambette 19 19, Qurmanǵazyda – 2, Jylyoıda – 7, Qyzylqoǵada aýdanynda 15 qaýipti ýchaske bar. Qaýipti ýchaskede 238 tyıym salý belgisi men 9 aqparattyq stend ornatylǵan.
Atyraý oblystyq Tótenshe jaǵdaılar departamenti basshysynyń orynbasary Asqat Erjanovtyń málimetinshe, byltyr sý aıdyndarynda 20 adam kóz jumǵan. Onyń ishinde 8 kámeletke tolmaǵan bala. Shomylý maýsymy kezinde 13 adam qutqaryldy.
Al bıylǵy jyl basynan sýǵa batýǵa baılanysty 8 derek tirkelip otyr. Sý aıdyndarynan 4 adam qutqarylǵan. Sońǵy bir aptada 4 adam ajal qushty.