Atyraýda adam ómirine qaýipti 1,5 tonnadan astam taýyq eti joıyldy
Atyraý qalalyq sanıtarlyq-epıdemıologııalyq baqylaý basqarmasynyń málimetinshe, taýyq etine saraptama júrgizilgen.
«Atyraý qalasyndaǵy kóterme jáne bólshek saýda nysandarynan sanıtarlyq-epıdemıologııalyq saraptama júrgizý úshin 108 túrli taýyq etiniń synamasy satyp alynǵan. Saraptama júrgizý nátıjesinde 108 synamanyń 40%-dan astamynyń Keden odaǵynyń tehnıkalyq reglamentteriniń talaptaryna sáıkes kelmeıtini anyqtaldy.
«Makınsk qus fabrıkasy» JShS-niń broıler-balapan etinen adam ómirine qaýip tóndiretin bakterıologııalyq kórsetkishi tabyldy. Osyǵan baılanysty iri kásipkerlik sýbektisi – «Metro Kesh end Kerrı» JShS-ǵa jospardan tys tekserý taǵaıyndaldy. Tekserý kezinde sýbekt tarapynan ónim sapasynyń talapqa sáıkes emestigi anyqtalyp, satylymdaǵy 1 tonna 597,65 keli broıler taýyq etin joıý týraly sanıtarlyq-epıdemıologııalyq nusqama berildi», -dep habarlady Atyraý qalalyq sanıtarlyq-epıdemıologııalyq baqylaý basqarmasy.
Adamnyń ómiri men densaýlyǵyna, janýarlar men qorshaǵan ortaǵa qaýip tóndiretin tamaq ónimderin joıý jónindegi komıssııanyń sheshimi negizinde qaýipti taýyq eti órteldi. Ónimdi joıý is-sharasyna Atyraý qalalyq sanıtarlyq-epıdemıologııalyq baqylaý jáne qalalyq veterınarlyq ınspektsııa basqarmalarynyń mamandary, sondaı-aq, «Metro Kesh end Kerrı» JShS-niń senimdi ókili qatysty.
Eske sala ketelik, budan buryn Atyraýda zańsyz aınalymnan 3972 bótelke alkogol men 2500 lıtr dızel alynǵanyn habarlaǵan edik.