Atyraýda Ábilhaıyr han men Bopaı hanym týraly kitap tanystyryldy
Oblystyq tarıhı-ólketaný mýzeıinde «Bopaı hanym: ónegege toly ómiri men qoǵamdyq-saıası qyzmeti» taqyrybymen konferentsııa ótti.
Konferentsııada Ábilhaıyr han men Bopaı hanym týraly zerttep júrgen tarıhshy-ǵalymdar men ólketanýshylar H.Dosmuhammedov atyndaǵy Atyraý ýnıversıtetiniń professory Lesqalı Berdiǵojın «Qazaq tarıhyndaǵy Ábilhaıyr han jáne onyń urpaqtary», «Saraıshyq» respýblıkalyq mýzeı-qoryǵynyń dırektory Ábilseıit Muqtar «Bopaı ananyń qoǵamdyq saıası kezeńdegi qyzmeti», ólketanýshy, Atyraý oblysynyń Qurmetti azamaty Ómirzaq Qajymǵalıev «Ábilhaıyr han men Bopaı hanymnyń urpaǵy – Bókeı hannyń tarıhtaǵy orny», «Aqparat» qoǵamdyq birlestiginiń tóraıymy Gúljan Eleshova «Bopaı hanymdy týrızm arqyly nasıhattaý joldary» taqyrybynda baıandama jasady.
El tarıhynda eleýli orny bar tulǵalardy zertteýshiniń biri – Islam qajy Myrzabekov. Ol kóp jylǵy izdenisiniń nátıjesinde «Ábilhaıyr han jáne Bopaı hanym» kitabyn jazǵan.
«Eliniń azattyǵy men ult keleshegi úshin qyzmet etken asyldarymyzdy umyt qaldyrmaýymyz kerek. Sondaı asyldyń qatarynda Bopaı hanym da bar. Biraq, onyń el tarıhyndaǵy ónegeli isin áli tolyq tanı alǵan joqpyz. Ol – bekzat bolmysty, adamı qasıeti erekshe jan. Qaıratkerligi men mámilegerlik qyry zertteý nysanasyna aınalǵany jón. Esimin el esinde máńgi qaldyrý úshin úlken shaharlardan kóshe ataýyn berý qajet», -deıdi kitap avtory Islam qajy Myrzabekov.
Eske sala ketelik, budan buryn Isataı aýdanynda Táýelsizdik monýmenti ashylǵanyn jazǵan edik.