Atyraýda 9 kópqabatty turǵyn úı birneshe saǵat jylýsyz qalǵan
Óńirlik kommýnıkatsııalar qyzmetiniń aqparatyna qaraǵanda, búgin túnde «Nursaıa» shaǵyn aýdanynda jylý qazandyǵy isten shyqqan. Sol sebepten 9 kópqabatty úıdegi páterlerge jylý berý toqtatylǵan. Jedel sharalar qabyldanyp, jylý berý tańǵa deıin qalpyna keltirilgen.
Búgin, 6 jeltoqsanda túske deıin oblys ákiminiń orynbasary Qaırat Nurtaev Atyraý qalasynyń «Nursaıa» shaǵyn aýdanyndaǵy 46,48,54 jáne 53-úıdiń turǵyndarymen kezdesti. Birneshe páterge kirip, jylýdy tekserip shyqty.
Ákim orynbasarynyń aıtýynsha, páterlerdegi jylý jelisiniń tehnologııa boıynsha qarastyrylmaǵan kez kelgen ózgerisi búkil úıdiń jylý júıesine keri áser etedi. Qazir oblys ortalyǵynda ortalyqtandyrylǵan jylýmen qamtý júıesi qalypty jumys isteıdi. Alaıda, turǵyn úılerge kommýnaldyq qyzmet kórsetý mekemesiniń basshylyǵy jylý berý úshin dıagnostıka júrgizbegeni anyqtalǵan.
«Osyǵan baılanysty «Nursaıa» shaǵyn aýdanyndaǵy turǵyn úılerge jylý berý máselesin oń sheshý úshin jumys toby quryldy. Onyń quramyna memlekettik organdar men kommýnaldyq kásiporyndardyń ókilderi engizildi. Jumys toby turǵyn úıler men áleýmettik nysandardyń jylýmen qamtamasyz etilýin qadaǵalaýmen aınalysady» -dedi Qaırat Nurtaev.
Atyraý qalalyq ákimdigi turǵyn úı-kommýnaldyq sharýashylyq bóliminiń aqparatyna qaraǵanda, qazir Atyraý jylý elektr ortalyǵynan barlyq jylý pýnktine jylý normatıvtik talaptarǵa sáıkes tolyq berilip otyr.
Eske sala ketelik, budan buryn Atyraýda monopolıst aýyz sý tarıfin 100 paıyzǵa kóterýdi surap otyrǵanyn habarlaǵan bolatynbyz.