Atyraýda 74 memlekettik qyzmetshiniń quqyǵy buzylyp, 14-i negizsiz jazaǵa tartylǵan

Atyraý oblysynda keıingi eki jylda 74 memlekettik qyzmetshiniń quqyǵy buzylǵan. Al, 14 qyzmetshi negizsiz tártiptik jazaǵa tartylǵan, dep habarlaıdy QazAqparat tilshisi.

Memlekettik qyzmet isteri agenttigi Atyraý oblysy boıynsha departamentiniń basshysy Erlan Ermahanbetovtiń aıtýynsha, memlekettik qyzmetshilerdiń quqyǵy men zańdy múddesin qorǵaýǵa basymdyq berilip otyr.

Departament qyzmetkerleri memlekettik qyzmet salasyndaǵy zańnamanyń saqtalýyna, azamattar men memlekettik qyzmetshilerdiń quqyǵyn, zańdy múddesin qorǵaýǵa basymdyq berip keledi. Osy oraıda, eki jyldaǵy derekterge sáıkes, 74 memlekettik qyzmetshiniń buzylǵan quqyǵy qalpyna keltirildi. Máselen, negizsiz tártiptik jazaǵa tartylǵan 14 qyzmetshige qatysty ýákiletti adamdardyń aktileriniń kúshi joıyldy. Tórt qyzmetshiniń qyzmetine tólenbegen bonýs qarjysy aýdaryldy. Negizsiz artyq jumysqa tartylǵan 21 qyzmetkerge aqy tólenetin demalys kúnderi berildi. Ústeme jumysy úshin 7 qyzmetkerge 294 myń teńge mólsherinde eńbegine aqy tólendi. Atqaratyn qyzmetinen zańsyz tómendetilgen 1 qyzmetker laýazymyna qaıtadan ornalastyrylyp, eńbekaqysynyń aıyrmasy óteldi, - dep habarlady Erlan Ermahanbetov.

Onyń deregine súıensek, Mahambet aýdany ákimdiginiń 2 qyzmetshisi shtattyń qysqartylýyna baılanysty 2 mln teńgege jýyq tólemaqysyn almaǵany anyqtalǵan. Olarǵa tıisti qarjysy tólengen. Sondaı-aq, 25 qyzmetshisiniń eńbekaqysy men issapar shyǵynyna berilmegen 368 myń teńge mólsherindegi qarjy aýdarylǵan.

Eske sala ketelik, buǵan deıin Almas Kópjanov Atyraý oblysy tsıfrlandyrý jáne arhıvter basqarmasyna basshy bolǵanyn habarlaǵan edik.