Atyraýda 600 oqýshyǵa arnalǵan jańa mektep ashyldy
Jańa bilim ordasy Atyraý qalasyndaǵy «Balaýsa» shaǵyn aýdanynda boı kótergen. Qurylysy 2019 jyly bastalyp, byltyr aıaqtalǵan.
«Bilim salasyn damytý – óskeleń urpaqqa tárbıe men sapaly bilim berý memlekettik saıasattyń basym baǵyttarynyń biri. Prezıdenttiń tapsyrmasyna sáıkes Atyraý qalasynda 8 mekteptiń qurylysy júrip jatyr. Aldaǵy ýaqytta Damby, Jańatalap, Talǵaıran, Aqjar-2, Kóktem, Birlik, Erkinqala eldi mekenderinde jańa mektepter ashylady. Bul qaladaǵy úsh aýysymdyq mektepterdiń sanyn azaıtady. Bıyl «Jaıly mektep» jobasy aıasynda 5 mekteptiń qurylysy bastalady. Maqsat – balalardyń turǵylyqty jeri boıynsha balabaqsha, mektepke barýyna yńǵaıly jaǵdaı jasaý» -dedi Atyraý qalasynyń ákimi Meıirim Qalaýı.
Jalpy bilim beretin №43 orta mektebiniń dırektory Gúljan Qaıyrjanovanyń aıtýynsha, M.Ótemisov atyndaǵy orta mektepten 1-4 synyptyń 203 oqýshysy men 5 muǵalimi aýysyp kelgen. Al, joǵary synyp oqýshylaryn qabyldaý muǵalim qatary tolyqtyrylǵasyn júzege asady. Qazir jańa mektepke 50 qyzmetker men 44 muǵalim qajet.
Úsh qabatty bilim ordasy tolyqtaı zamanaýı úlgimen salynǵan. Synyp kabınetteri ınteraktıvti taqtamen, zerthana bólmesimen jabdyqtalǵan. Al, ashana, sport zaly, júgirý joly, tennıs, fýtbol, basketbol, syrǵanaq alańdary, balalar oınaıtyn labırınt jańa qural-jabdyqtarmen qamtylǵan.
Qazir bilim ordasynda oqýǵa 611 oqýshy, mektepaldy daıarlyq tobyna 45 bala tirkelgen.
Eske sala ketelik, buǵan deıin Atyraýda 600 oryndyq jańa mekteptiń qurylysy aıaqtalǵanyn habarlaǵan bolatynbyz.