Atyraýda 53 jastaǵy áıeldiń jatyrynan 8 keli mıoma alyndy

ATYRAÝ. QazAqparat – Atyraýda 53 jastaǵy áıeldiń jatyryna ota jasalyp, 8 keli mıoma alyndy, dep habarlaıdy QazAqparat Óńirlik kommýnıkatsııalar qyzmetiniń aqparatyna silteme jasap.

Oblystyq aýrýhanadaǵy gınekologııa bólimshesiniń meńgerýshisi Janargúl Bekenovanyń aıtýynsha, 53 jastaǵy áıel qabyldaý bólimshesine kelgende qatty aýyrsyný týraly aıtqan.

«Naýqastyń ishki aǵzasy aýyryp turdy. Júregi aınyp, qusqan. Aǵzasynda álsizdik, bas aınalýy baıqaldy. Jynys jolynan qan ketken. Bizdiń bólimshe dárigerleri naýqasty tolyq tekserýden ótkizdi. Onyń qorytyndysymen naýqasqa «Jatyrdyń alyp mıomasy. Túıin nekrozy, ortasha anemııa» dıagnozy qoıyldy», - deıdi Janargúl Bekenova.

Bólimshe meńgerýshisiniń jetekshiligimen gınekolog dárigerler Іnkár Ondasynova men Maqsat Týǵanbaev naýqastyń jatyryna ota jasap, salmaǵy 8 keli mıomany alyp tastaǵan. Qazir naýqas oblystyq aýrýhananyń gınekologııa bólimshesinde qarqyndy em-dom sharasyn alyp jatyr.

Mıoma – jatyrdyń qaterli emes isigi.

Eske sala ketelik, budan buryn Atyraýda bir jasar balanyń mıyna kúrdeli ota sátti jasalǵanyn habarlaǵan bolatynbyz. «Mıdaǵy qan ketý» dıagnozy ýltradybystyq zertteý qorytyndysymen rastalǵan. Birneshe ret ota jasalyp, balanyń jaǵdaıy jaqsara bastaǵan. Alaıda, balanyń mıynda alty isik ósip, almanyń kólemindeı deńgeıge jetken.

«Mundaı jaǵdaı elimizdiń ózge qalalarynda kezdesti. Sol sebepten, biz Atyraýǵa balalar neırohırýrgy Danııar Sabdınalıevti sheberlik sabaǵyn ótkizýge shaqyrdyq. Birneshe saǵatqa sozylǵan ota kezinde balanyń mıyndaǵy bul patologııany alyp tastadyq. Qazir naýqastyń jaǵdaıy qanaǵattanarlyq deýge bolady. Osyndaı biregeı ota bizdiń aýrýhanada jasalady», - deıdi balalar aýrýhanasynyń neırohırýrgi Shoder Arıpov.