Atyraýda 3D formatyndaǵy jaıaý júrginshiler belgisi ornatyldy
3D formatyndaǵy alǵashqy jaıaý júrginshi joly Qulmanov kóshesinde paıda boldy. Joba qalalyq turǵyn úı-kommýnaldyq sharýashylyǵy jolaýshylar kóligi jáne avtomobıl joldary bóliminiń bastamasymen qolǵa alynǵan. «3D formattaǵy jaıaý júrginshiler joly - qala kqshelerindegi jazataıym oqıǵalardyń aldyn alý maqsatynda, joldan ótip bara jatqan jaıaý júrginshilerdiń ómirin qaýipsizdendirýge arnalǵan. Qazirgi tańda qalalyq turǵyn úı-kommýnaldyq sharýashylyq bólimi bul baǵytta aýqymdy jumystar júrgizýde. Máselen, aǵymdaǵy jyldyń ózinde oblys ortalyǵynda 315 jańa jol belgileri ornatylyp, jaıaý júrginshiler joly zamanaýı jaryqtandyrǵyshtarmen qamtyldy», - deıdi qalalyq TKSh bóliminiń baspasóz hatshysy Ańsaǵan Saǵynbaeva. Sonymen qatar, Atyraý qalasynyń mektepteri men balabaqshalarynyń mańynda jol belgileri jańartylyp, qala mańyndaǵy eldi mekenderde jaıaý júrginshiler ótkeline arnalǵan jaryqdıodty shamdar ornatylǵan. Aıta keteıik, sońǵy selektorlyq jınalys kezinde Atyraý oblysynyń ákimi Nurlan Noǵaev jol qaýipsizdigi taqyrybyn talqylap, polıtsııa departamentiniń basshylyǵyna jáne jergilikti atqarýshy organdarǵa jol-kólik oqıǵalarynyń sanyn azaıtý jóninde birqatar tapsyrmalar bergen bolatyn.