Atyraýda 34 nysan Ashyq jobasynan eki aptaǵa shettetildi

ATYRAÝ. QazAqparat – Atyraýda 34 kásipkerlik nysany Ashyq jobasynan eki aptaǵa shettetildi, dep habarlaıdy QazAqparat.

«Atameken» UKP óńirlik fılıalynyń dırektory Abdolla Idresovtiń aıtýynsha, «Ashyq» baǵdarlamasyna kásipkerlerdi tirkeý 26 sáýirde bastalǵan.

Sodan beri arnaıy QR-kodty alýǵa 660 ótinim túsken. Onyń ishinde 620 nysan QR-kod alǵan.

«QR-kodty alǵandar arasynda Atyraý qalasynan 427, Jylyoı aýdanynan 65, Inderden – 39, Qurmanǵazydan – 23, Isataıdan – 18, Maqat, Mahambet jáne Qyzylqoǵa aýdandarynyń árqaısysynda 16 nysan bar. Al, 453 nysan testtik rejımnen ótti» -deıdi Abdolla Idresov.

Onyń aıtýynsha, nysandardyń «Ashyq» jobasynan eki aptaǵa shettetilýine 3 jáne odan da kóp kún ishinde kelýshilerdiń tirkelmeýi sebep bolǵan.

Eske sala ketelik, budan buryn Atyraýda birneshe nysannyń jumysy toqtaıtynyn habarlaǵan edik.