Atyraýda 313 otbasyǵa turǵyn úı kómegi retinde 12,5 mln teńge tólendi
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń málimetinshe, kómek alǵan áleýmettik turmysy tómen 313 otbasynda 671 adam bar.
«Turǵyn úı kómegi «Turǵyn úı qatynastary týraly» zańyna sáıkes, az qamtylǵan otbasylarǵa kommýnaldyq qyzmetterge aqy tóleýge áleýmettik qoldaý kórsetý maqsatynda beriledi. Bul kómekti taǵaıyndaý kezinde ótken toqsannyń tabysy men ótken toqsanǵa tólengen shyǵystar qaralady. Atyraý oblysynda turǵyn úı kómegin taǵaıyndaý úshin jol beriletin shektiń úlesi 5 paıyzdy quraıdy. Osy jyldyń 1 qarashasyna az qamtylǵan 671 adamnan turatyn 313 otbasyna 12,5 mln teńge kóleminde turǵyn úı kómegi taǵaıyndalyp, tólendi», - deıdi Azamat Mámbetov.
Onyń aıtýynsha, zeınetkerler, jumyssyzdar, múgedekter, kópbalaly otbasylar, jalǵyzbasty analar, az qamtylǵan azamattar, balalar men qart adamdarǵa kútim jasap otyrǵandar turǵyn úı kómegin alýshylardyń sanatyna jatady. Turǵyn úı kómegin alý úshin «Elektrondyq úkimet» portaly arqyly ótinish joldaýǵa nemese «Azamattarǵa arnalǵan úkimet» memlekettik korporatsııasy» KeAQ arqyly tıisti qujattarmen birge ótinish berýge bolady.
Eske sala ketelik, buǵan deıin Atyraýda jertólede turyp jatqan kópbalaly otbasyna ýaqytsha baspana berilgenin jazǵan edik.