Atyraýda 300 oryndyq mektep paıdalanýǵa berildi
Atyraý qalasyna irgeles Jumysker eldi mekeninde ornalasqan Ǵ.Muratbaev atyndaǵy
mekteptiń irgetasy 1965 jyly qalanǵan. Sodan beri jóndeý kórmegen 160 oryndyq bilim
oshaǵynyń ǵımaraty apatty jaǵdaıda dep tanylǵan edi. Sol sebepten jańa 300 oryndyq
jańa ǵımaratty salýǵa bıýdjetten 340 mln teńge bólingen.
Oblys ákimi Mahambet Dosmuhambetovtiń málimetinshe, Atyraý qalasyndaǵy apatty
jaǵdaıda turǵan eki mekteptiń biri Ǵ.Muratbaev atyndaǵy orta mektep bolatyn. Endi úsh
aýysymdyq problemasy bar bir mektep qana qaldy. Sonymen birge, bul mekteptiń
oqýshylary oqyp kelgen I.Taımanov atyndaǵy orta mekteptiń úsh aýysymda oqytý
máselesi de óz sheshimin tapty.
«Apatty jaǵdaıda turǵan sońǵy mekteptiń de máselesin sheshemiz. Atap aıtqanda, №1
M.Jumabaev atyndaǵy orta mektep ornyna aldaǵy ýaqytta 160 oryndyq jańa ǵımarat
salý josparlanýda. Atyraý qalasyndaǵy mektepterdiń oryn tapshylyǵyn sheshý
maqsatynda 4 mekteptiń janynan qosymsha 120 oryndyq japsarjaı qurylystary
salyndy. Budan bólek bıyl «Samal» yqshamaýdanynda 600 oryndyq, «Bereke»
yqshamaýdanynda 1200 oryndyq, Damby aýylynda 300 oryndyq jańa mektep
qurylystary salynýda», -dedi Mahambet Dosmuhambetov.
Ákimniń aıtýynsha, bilim berý uıymdarynyń materıaldyq-tehnıkalyq jaǵdaıyn
jaqsartý jalǵasady. Oqýshylardy jańa oqýlyqtarmen qamtý, tegin ystyq tamaqpen
qamtamasyz etý jumystary da josparly túrde júrgiziledi.
Mekteptiń alǵashqy túlegi, ardager ustaz Marýsıa Bitimálıeva men Jumysker eldi mekeniniń turǵyny Serik Musaǵalıev jańa oqý ǵımaratyn asyǵa kútkenine toqtaldy.
«Nazarbaev zııatkerlik mektepteri» AQ Basqarma tóraıymy Kúlásh Shamshıdınova men
ardager ustaz Bóken Ǵumar bilim ordasynyń lentasyn qıdy.
Ǵ.Muratbaev atyndaǵy 300 oryndyq orta mekteptiń qurylysyn «BatysStroıServıs-
Atyraý» JShS júrgizgen.
Jańa mektep fızıka, hımııa zerthanalary, akt zaldar men alańdar, ashana,
jańa úlgidegi tehnologııa, ınformatıka, Stem-kabınetterimen jabdyqtalǵan.