Atyraýda 300-ge jýyq shetel azamaty turaqty turýǵa ruqsat aldy
Oblystyq polıtsııa departamenti baspasóz qyzmetiniń málimetine súıensek, Atyraý oblysyna kelip, turaqty turýǵa ótinim bergenderdiń arasynda TMD elderiniń azamattarymen birge, Ulybrıtanııa, Italııa, Úndistan, Túrkııa sekildi shet memleketterdiń ókilderi de bar.
Olar otbasy jaǵdaıyna baılanysty Qazaqstanda turýǵa ruqsat alýǵa sheshim qabyldap, kóshi-qon polıtsııasyna tıisti ótinishpen júginedi.
Sonyń biri – Ózbekstan Respýblıkasynyń azamaty Baqyt Estemirova. Ol Qazaqstanda turaqty turý úshin kóshi-qon polıtsııasyna qujat tapsyrǵan.
«Ótken jyldyń qazan aıynda Ózbekstandaǵy esepten shyǵyp, kámeletke tolmaǵan qyzymmen Qazaqstanǵa keldim. Meniń kúıeýim osynda turady. Birden turaqty turýǵa ruqsat alý úshin ótinish berdim. Qujat rásimdeýge kóshi-qon polıtsııasy kómektesti. Mamandar rásimdeý protsedýrasyn egjeı-tegjeıli túsindirdi. Ótinishimdi kidirissiz qabyldady. Turaqty turýǵa ruqsat aldym. Endi Qazaqstan Respýblıkasynyń azamattyǵyn alý úshin qujat jınaqtap júrmin», - deıdi Baqyt Estemirova.