Atyraýda 29 jastaǵy boıjetken bıiktikten qulap, mert boldy
Oqıǵa búgin, 23 mamyrda jergilikti ýaqytpen saǵat 11:30 shamasynda bolǵan. Bul derekti Atyraý oblystyq Polıtsııa departamentiniń baspasóz qyzmeti rastady.
«Atyraý qalasyndaǵy «Almagúl» shaǵynaýdanyndaǵy kópqabatty turǵyn úıdiń joǵarǵy qabatynan 1994 jyly týǵan azamatsha qulaǵan. Boıjetken oqıǵa ornynda qaza tapty. Onyń júıke aýrýlarymen esepte turǵany anyqtaldy», - dep málim etti Polıtsııa departamentiniń baspasóz qyzmetinen.
Qazir polıtsııa qyzmetkerlerinen quralǵan jedel top atalǵan oqıǵaǵa baılanysty tergeýdi bastady.
Eske sala ketelik, budan buryn 23 jastaǵy atyraýlyq on altynshy qabattan sekirýge oqtalǵanyn jazǵan bolatynbyz. Bul oqıǵa da Atyraý qalasyndaǵy «Almagúl» shaǵynaýdanynda tirkelgen. Polıtsııaǵa turǵyn úıdiń 16-qabatynan belgisiz er azamattyń sekirgeli turǵany jóninde habar túsken.
«Oqıǵa ornyna Atyraý qalalyq polıtsııa basqarmasy patrýldik polıtsııa batalonynyń vzvod komandıri Danabek Saqýov, qyzmet ınspektorlary, polıtsııa aǵa leıtenanty Aıdos Qubıev pen polıtsııa leıtenanty Serik Joldyǵalıuly jedel jetti. Polıtseıler joǵarǵy qabatqa kóterilgende, er adam ózine jaqyndamaýyn eskertip, aıǵaılaı bastaǵan. Jaǵdaıdy baǵdarlaǵan polıtseıler er adammen dıalog qurýǵa tyrysqan. Olar yńǵaıly sátte shapshań qımyldap er adamnyń arqasynan ustap, balkonǵa tartyp kirgizgen», - dep habarlaǵan edi departamenttiń baspasóz qyzmetinen.
Keıin 44 jastaǵy mas áıel kópirden sekirmek bolǵanyn jazdyq.
Sondaı-aq 17 jastaǵy jasóspirim kópirden sekirip ketkenin habarlaǵan edik.