Atyraýda 23 jastaǵy boıjetken kópirden sekirip ketti
Oblystyq tótenshe jaǵdaılar departamentiniń qoǵammen baılanys tobynan málim etkendeı, oqıǵa búgin, 26 sáýirde Atyraý qalasynda boldy.
«Bul týraly polıtsııa qyzmetkerlerinen búgin jergilikti ýaqytpen saǵat 15:50-de baılanys beketine habar tústi. Atyraý qalasyndaǵy Turǵyndar qalashyǵy shaǵynaýdanyndaǵy jaıaý júrginshiler kópirinen 23 jastaǵy boıjetken Jaıyq ózenine sekirip ketkeni anyqtaldy. Oqıǵa ornyna dereý jetken tótenshe jaǵdaılar departamentiniń qutqarýshylary men polıtsııa qyzmetkerleri jedel áreket etip, ózenge sekirgen boıjetkendi qutqaryp qaldy. 2000 jyly týǵan qyz T.A.-ǵa «Apattar medıtsınasy ortalyǵy» memlekettik mekemesiniń qyzmetkerleri alǵashqy medıtsınalyq kómek kórsetip, aýrýhanaǵa jetkizdi«, - dep habarlady departamenttiń qoǵammen baılanys tobynan.
Qutqarý jumystaryna Atyraý oblystyq Tótenshe jaǵdaılar departamentinen 3 qyzmetker men 1 tehnıka, «Apattar medıtsınasy ortalyǵy» mekemesinen 3 qyzmetker, 1 tehnıka, polıtsııa departamentinen 5 qyzmetker men 2 tehnıka jumyldyryldy.