Atyraýda 17 jastaǵy jasóspirim kópirden sekirip ketti

ATYRAÝ. QazAqparat – Atyraýda 17 jastaǵy er bala kópirden sekirip ketti, dep habarlaıdy QazAqparat tilshisi.

Atyraý oblystyq Tótenshe jaǵdaılar departamenti qoǵammen baılanys tobynyń málimetinshe, bul týraly 20 mamyrda jergilikti ýaqytpen saǵat 22:40-ta habar túsken.

«Oqıǵa ornyna jedel qutqarý jasaǵynyń qutqarýshylary 2 mınýtta jetti. Qutqarýshylar jedel áreket etip, kópirden Jaıyq ózenine sekirgen jasóspirimdi qutqaryp qaldy. Onyń jasy 17-de ekeni anyqtaldy. «Apattar medıtsınasy ortalyǵy» memlekettik mekemesiniń qyzmetkerleri jasóspirimge alǵashqy medıtsınalyq kómek kórsetip, jedel járdem brıgadasyna tapsyrdy», - dep habarlady departamenttiń qoǵammen baılanys tobynan.

Polıtsııa departamentiniń málimetinshe, kópirden sekirgen jasóspirimdi qutqarýǵa polıtsııa podpolkovnıgi Abý Nurlan, polıtsııa kapıtany Rıshat Berkalıev, kólik ınspektsııasynyń qyzmetkeri Batyrbek Jırenshın men polıtsııa aǵa leıtenanty Batyrbek Kamalov, polıtsııa leıtenanty Zaýyrbek Shaıhatov atsalysqan. Qazir jedel tergeý toby jasóspirimniń áreketine qatysty tekserýdi bastady.

Qutqarý jumystaryna Atyraý oblystyq Tótenshe jaǵdaılar departamentiniń jedel qutqarý jasaǵynan 4 qyzmetker men 2 tehnıka jumyldyryldy.

Aıta keteıik, Atyraýda kópirden sekirý jaǵdaılary jıilep tur. Bul – sáýirden bergi tórtinshi oqıǵa.

Buǵan deıin Atyraýda bir aıǵa jýyq ýaqyt buryn joǵalǵan qyzdyń múrdesi tabylǵan edi.

Jasóspirim qyz 6 sáýirde úıinen shyǵyp ketip, keıin oralmaǵan. Oblystyq Tótenshe jaǵdaılar departamentiniń qutqarýshylary izdeýge 7 sáýirde kiristi. Keıin onyń kópirden sekirgeni anyqtaldy.

Al 26 sáýirde 23 jastaǵy boıjetken kópirden sekirip ketti.

Sondaı-aq 44 jastaǵy mas áıel kópirden sekirýge oqtalǵanyn habarlaǵan bolatynbyz.