Atyraýda 150 myńnan astam maska tegin taratylady
Óńirlik kommýnıkatsııalar qyzmetiniń málimetinshe, bul úshin demeýshiler men belsendi kásipkerler tartylǵan. Atap aıtqanda, «Munaıservıs» JShS basshylyǵy 156 myń maskaǵa jetetin 12 000 metr mata satyp alyp bergen. Bul matadan birneshe kásiporyn («Sari Suppliers» JShS, «Safety Systems», «Mastertex», «Sańyraýlar qoǵamy ÓK», «ERTRI» JShS) men erikti jastar maskany tegin tigýde. Búginge deıin 12 myń maska tigilip, áleýmettik álsiz top múshelerine, aldyńǵy shepte qyzmet kórsetip júrgen azamattarǵa tegin taratyla bastady.
Atyraý oblysy ákiminiń orynbasary Erjan Ábilhanovtyń aıtýynsha, oblys ákimdigi buǵan deıin iri kompanııalardy tartyp, óńirdiń medıtsınalyq qyzmetkerlerine qajetti qural-jabdyq alǵan. Endigi kezekte áleýmettik áljýaz toptar men aldyńǵy shepte júrgenderdi tegin maskamen qamtamasyz etý jumysy júrgizilýde. Aldaǵy ýaqytta mundaı sharalar jalǵasyn tabady.
Ákimdiktiń tegin maska tigip taratý sharasyna atsalysqandardyń biri – 32 jumysshysy bar «Master Tex Atyrau» JShS. Onyń dırektory Bolatbek Tóleýbektiń aıtýynsha, kásiporyn kún saıyn 800 maskamen birge oblystaǵy medıtsına qyzmetkerlerine arnalǵan kombınezon da tigip jatyr.
«Qazaqstan Prezıdenti Qasym-Jomart Toqaev otandyq bıznesti qazirgi qıyn kezeńde koronavırýs ınfektsııasymen kúreske kómektesýge shaqyrǵan bolatyn. Bizdiń kásiporynda 20 tiginshi táýligine 800-ge deıin maska tigedi. Búginge deıin 12 myń danadan astam maska daıyndaldy. Olar muqtaj jandarǵa tegin taratylýda. Sonymen qatar, aýrýhanalardaǵy dárigerlerge de bir rettik qorǵanysh kombınezonyn da tigemiz», - deıdi Bolatbek Tóleýbek.
Maska eriktiler uıymy men áleýmettik qamsyzdandyrý basqarmalary men bólimderi arqyly taratylýda. Sonymen qatar, oblysta jeke kásipkerler, kásiporyndar men jekelegen azamattardyń tigip, satyp jatqan maskalaryna monıtorıng júrgizilýde.
Shamamen kúnine 25 myń maska tigilip, satylýda.