Atyraýda 15 qabatty úıdiń dálizinen órt shyǵyp, turǵyndar evakýatsııalandy

ATYRAÝ. QazAqparat – Atyraýda dálizinde órt shyqqan kópqabatty úıden 25 adam evakýatsııalandy, dep habarlaıdy QazAqparat tilshisi.

Oblystyq Polıtsııa departamenti baspasóz qyzmetiniń málimetinshe, órt búgin, 19 mamyrda saǵat 11:40 shamasynda bolǵan.

«Atyraý qalasynyń Áıteke bı kóshesinde ornalasqan 15 qabatty úıdiń dálizindegi qosalqy bólmeden órt shyqqan. Órtengen turǵyn úıge Atyraý qalalyq polıtsııa basqarmasynyń aǵa ýchaskelik polıtsııa ınspektorlary Samalbek Begalıev pen Asylanbek Jolaı jedel jetip, jalynnyń úshinshi qabattan shyǵyp jatqanyn baıqaǵan. Tártip saqshylary tótenshe jaǵdaı qyzmetkerlerimen birge turǵyndardy órt qaýpinen qutqarýǵa kiristi. Qyzmetkerlerdiń birlesken jedel áreketiniń nátıjesinde jalyn sharpyǵan úıden eki zeınetker, 10 jasóspirim (onyń ishinde tórt náreste bar) men 13 turǵyn qaýipsiz jerge shyǵaryldy», - dep habarlady departamenttiń baspasóz qyzmetinen.

Adamdardy qutqarýǵa atsalysqan ýchaskelik polıtsııa ınspektorlarynyń aıtýynsha, órtten zardap shekkender joq.

Eske salaıyq, budan buryn Atyraýda shatyry órtengen úıden 25 adam qaýipsiz jerge evakýatsııalanǵanyn habarlaǵan edik. Órtengen úıge shaqyrtý boıynsha polıtsııa maıory Qýanysh Bozaqaev pen polıtsııa kapıtany Erlan Myrzagereev 4 mınýtta jetken. Keıin 9-qabatqa páter ıesimen birge jedel kóterilip, turǵyndardy evakýatsııalaýǵa kirisken. Shatyrda tutanǵan órt joǵary qabattaǵy páterlerdiń balkonyn da sharpyǵan. Qos polıtseı páterlerden 25 turǵyndy qaýipsiz jerge evakýatsııalaǵan.