Atyraýda 13 seriktestikten 23 mln teńge para alǵan bas maman sottaldy

ATYRAÝ. QazAqparat – Atyraýda kóliktik baqylaý ınspektsııasynyń bas mamany 13 seriktestikten 23 mln teńge para alǵan. Sot úkimimen ol 8 jylǵa bas bostandyǵynan aıyryldy, dep habarlaıdy QazAqparat tilshisi.

Atyraý qalasynyń №2 sotynda oblystyq kóliktik baqylaý ınspektsııasynyń bas mamanyna qatysty Qylmystyq kodekstiń 366-baby 3-bóliginiń 3,4-tarmaqtarymen (Іri mólsherde birneshe ret para alý) qozǵalǵan qylmystyq is qaraldy.

«Atyraý oblysy boıynsha kóliktik baqylaý ınspektsııasynyń bas mamany S. iri gabarıtti nemese aýyr salmaqty kólik quraldarynyń Atyraý oblysy aýmaǵynan kedergisiz qozǵalýyna yqpal jasaǵany úshin 2020-2022 jyldar aralyǵynda 13 JShS-dan birneshe ret iri mólsherde para alyp kelgen. Jalpy somasy 23 817 000 teńgeni jubaıynyń, anasynyń, enesiniń, áriptesiniń jubaıynyń atyndaǵy «Kaspi Gold» qosymshasyndaǵy shottar arqyly alǵan. Kórsetilgen mán-jaılar men sottalýshynyń kinási kýálardyń aıǵaqtarymen, jedel-tergeý áreketiniń nátıjelerimen, beınejazbalarmen, arnaıy tekserý qujattarymen, sot fonografııalyq, sot psıhologııalyq-fılologııalyq saraptamalar jáne aýdıtorlyq qorytyndylarmen dálelin tapty», - dep habarlady №2 sottyń baspasóz qyzmetinen.

Prokýror sottalýshyǵa 8 jyl merzimge bas bostandyǵynan aıyrý jazasyn taǵaıyndaýdy usynǵan. Alaıda, sottalýshy ózine taǵylǵan aıyppen kelispeı, ózin aqtaýdy suraǵan.

Sot úkimimen ol ómir boıyna memlekettik qyzmette laýazym atqarý quqyǵynan aıyrylyp, 8 jylǵa sottaldy.

Sot úkimi zańdy kúshine engen joq.