Atyraýda 120 oryndyq taǵy bir ınfektsııalyq statsıonar ashyldy

ATYRAÝ. QazAqparat – Atyraýda kornavırýs ınfektsııasyn juqtyrǵan naýqastar úshin taǵy da 120 oryndyq ınfektsııalyq statsıonar ashyldy, dep habarlaıdy QazAqparat.

Oblystyq densaýlyq saqtaý basqarmasynyń baspasóz qyzmetinen málim etkendeı, qaýipti vırýsqa shaldyqqan naýqastar sany ósken.

Osyǵan baılanysty Atyraýdaǵy temirjol aýrýhanasynda 120 oryndyq ınfektsııalyq statsıonar iske qosyldy.

Qazir temir jol aýrýhanasynda ashylǵan ınfektsııalyq statsıonarǵa koronavırýs juqtyrǵan 48 naýqas jatqyzylǵan.

«Buǵan qosa, Mahambet aýdanyndaǵy ftızıopýlmanologııa ortalyǵynda - 150, sondaı-aq, Atyraýda jataqhanalardyń birinde - 200 oryndyq ınfektsııalyq statsıonar daıyndaldy», - dep málim etti basqarmanyń baspasóz qyzmetinen.

Eske sala ketelik, budan buryn Atyraýdyń úsh aýdanyndaǵy ınfektsııalyq statsıonar naýqastarǵa tolǵan bolatyn.