Atyraýda 11 mektep úsh aýysymda oqytýdy jalǵastyrady
Atyraý qalasynyń ákimi Shákir Keıkinniń aıtýynsha, oryn tapshylyǵynyń saldarynan úsh aýysymda jumys isteıtin mektep áli joıylǵan joq.
«Oblys ortalyǵyndaǵy turǵyndar arasynda demografııalyq ósim baıqalyp otyr. Qalaǵa kóship kelýshiler de bar. Osyndaı sebepter oqýshylar sanyn arttyryp, bilim berý salasyna salmaq túsirýde. Jaqynda arnaıy tekserýdiń qorytyndysymen Atyraý qalasyndaǵy Y.Altynsarın, M.Lomonosov jáne S.Muqanov atyndaǵy orta mektep apatty dep tanyldy. Ótken oqý jylyndaǵydaı bıyl da 11 mektep oqýshylardy úsh aýysymda oqytýdy jalǵastyrady. Bul másele jańa mektepterdi paıdalanýǵa berý arqyly sheshiletin bolady», - deıdi Shákir Keıkin.
Qalalyq bilim basqarmasynyń basshysy Aınagúl Dúısekenovanyń málimetinshe, jańa oqý jylynda 1-synypqa 7 844 oqýshy qabyldanǵan. Shahardaǵy mektepterge 1-11 synyptarǵa qosymsha suranys boıynsha 217 503 dana oqýlyq satyp alynǵan. Turmysy tómen, kópbalaly 8 409 otbasyndaǵy ár balaǵa 41 myń teńgeniń qarjylaı kómegi kórsetilgen.
Jergilikti polıtsııa qyzmeti basqarmasynyń bastyǵy Erlan Bıǵambaevtyń deregine qaraǵanda, jasóspirimder arasyndaǵy quqyq buzýshylyq kórsetkishi 29,6 paıyzǵa ósken.
«Biz balalar men jasóspirimderdiń qaýipsizdigin basty nazarda ustap otyrmyz. Oqýshylardyń áleýmettik jaǵdaıy, kúndelikti kóńil kúıi, aralasý ortasy, sabaqqa yntasy synyp jetekshilerine málim. Sol sebepten synyp jetekshilerinen keleńsiz oqıǵalar men kúmándi áreketter baıqalsa, mektep ınspektoryna habar berýin suraımyz. Bul mektep oqýshylarynyń zardap shekpeýine, zorlyq-zombylyqqa ushyramaýyna áser etedi», - dep málim etti Erlan Bıǵambaev.
Eske sala ketelik, budan buryn Atyraýda birneshe mekteptiń oqýshylary jóndeý jumysyna baılanysty ózge bilim ordasynda oqıtynyn jazǵan edik.