«Atyraý jastary» turǵyn úı baǵdarlamasy iske qosylady
Atyraý oblysynyń turǵyndaryna «Atyraý jastary» baǵdarlamasy 31 qazan – halyqaralyq Jınaqtaý kúni aıasynda tanystyryldy. Oblys ákimdigi men «Otbasy bank» AQ-nyń birlesken jobasy 35 jasqa deıingi jastarǵa arnalǵan. Maqsaty – jastardyń barynsha tıimdi sharttarmen baspana satyp alýyna jol ashý. Atalmysh baǵdarlamaǵa dárigerler, muǵalimder, mádenıet jáne sport salasynyń ókilderi, joǵary oqý oryndarynyń professorlary, ǵylymı-zertteý ınstıtýttarynyń ǵylymı qyzmetkerleri, jýrnalıster, áleýmettik sala men kommýnaldyq kásiporynda jumys isteıtinder, sondaı-aq, jetim balalar sanatymen turǵyn úı kezeginde turǵan azamattar qatysa alady.
Baǵdarlamany iske asyrý jónindegi ekijaqty kelisimge Atyraý qalasynyń ákimi Meıirim Qalaýı men «Otbasy bank» AQ Atyraý oblystyq fılıalynyń dırektory Nurbol Qurman qol qoıdy.
«Bizdiń banktiń ustanatyn basty maqsaty – qazaqstandyqtardy jaıly baspanamen qamtamasyz etý. Jańadan iske qosylatyn «Atyraý jastary» baǵdarlamasy tabysy joǵary emes jastardyń baspana máselesin oń sheshýge baǵyttalyp otyr. Óıtkeni, jastar da páter alǵysy keledi. Sol maqsatta Otbasy bankindegi shottaryna qarajat jınap júrgenin bilemiz. Alaıda, turǵyn úı satyp alýǵa barlyǵynyń birdeı múmkindigi jete bermeıdi. Al, jańa turǵyn úı baǵdarlamasy iske qosylǵan soń jastardyń bul armany jaqyn arada júzege asa bastaıdy. Bul jobaǵa oblys ákimdigi 1 mlrd teńge, al, Otbasy bank 600 mln teńge bóledi», -dep túsindirdi «Otbasy bank» AQ Atyraý oblystyq fılıalynyń dırektory Nurbol Qurman.
Onyń aıtýynsha, Atyraý oblysy – jastardy turǵyn úımen qamtamasyz etý baǵdarlamasy qolǵa alynǵan jetinshi óńir. Buǵan deıin dál osyndaı joba Almaty men Astana qalasynda, Qaraǵandy, Taraz, Qostanaı jáne Almaty oblystarynda júzege asyrylǵan. Qazir oblys ákimdikteri men «Otbasy bank» AQ-nyń jastardyń nesıe alýyna jumsaǵan ortaq bıýdjetiniń kólemi 60 mlrd teńgeden asyp otyr.
Al, «Atyraý jastary» baǵdarlamasyna qatysatyn áleýetti nesıe alýshylardyń tizimin jergilikti ákimdik usynady. Ákimdik baǵdarlamaǵa qatysý úshin ótinishti qabyldaý jáne baıqaý kezeńin daıyndap jatyr.
«Baǵdarlamaǵa qatysýshylar pýly qurylady. Sodan soń qatysýshylarǵa Otbasy bank arqyly turǵyn úı zaemin alýǵa joldama usynylady. Úmitkerler ózderiniń tólem qabilettiligin rastaǵannan keıin jyldyq 5 paıyzben zaem alady. Munda alǵashqy jarna 10 paıyz ǵana bolady. Baǵdarlama qatysýshylaryna beriletin nesıeniń eń kóp somasy – 18 mln teńge. Bul qarjy Atyraý qalasynan úı satyp alýshylarǵa beriledi. Al, Atyraý oblysynyń aýmaǵynan baspana satyp alý úshin 13 mln teńgege deıin nesıe berý kózdelip otyr. Nesıe merzimi – 25 jyl», -deıdi Nurbol Qurman.
«Otbasy bank» AQ – elimizde qarjy jınaqtaý úrdisin engizip, turǵyndardyń jaıly baspana satyp alýyna múmkindik bergen birden-bir qarjy ınstıtýty. Qazir 2,4 mln qazaqstandyq bolashaqta baspanaly bolýy úshin atalǵan bankte ashqan shotyna qarajat jınaý ústinde. Osy ýaqytta salymshylardyń shottarynda jalpy kólemi 2 trln teńge jınaqtalǵan. Bankte kúnine 2 myńǵa jýyq jańa depozıt ashylady. Bastapqy jarnaǵa qarajat jınap júrgen salymshylar «Otbasy bank» AQ-dan jyldyq 3,5%-dan 11,5%-ǵa deıingi mólsherlememen nesıe alý múmkindigine ıe bolady. Máselen, bıyl bul múmkindikti 68 721 adam paıdalanyp, jaıly baspanaǵa qol jetkizdi. Bank klıentterine ortasha eseppen kúnine 410 nesıe beriledi.
Statıstıkalyq málimetke súıensek, qazir Atyraý oblysynda 668 090 adam turady. Tek bıylǵy jyldyń ózinde olardyń 86 myńǵa jýyǵy Otbasy bankinen depozıt ashyp, 8 myńnan astamy nesıe alǵan.
«Atyraý jastary» baǵdarlamasynyń qatysýshylaryna qoıylatyn birneshe talap bar. Birinshiden, ótinim bergen kezde qatysýshynyń jasy 35-ten aspaýy kerek. Ekinshiden, qatysýshynyń Atyraý oblysynda nemese Atyraý qalasynda keminde sońǵy bir jyl turaqty tirkeýi jáne ótinish bergen kezde ózimen birge turatyn otbasy músheleriniń Atyraý oblysynda tirkeýi bolýy tıis. Úshinshiden, baǵdarlamaǵa qatysýshynyń jáne onyń otbasy músheleriniń sońǵy 5 jyl ishinde Qazaqstan Respýblıkasynyń aýmaǵynda satyp alý quqyǵymen jalǵa beriletin nemese menshik quqyǵyndaǵy turǵyn úıiniń joqtyǵy eskeriledi. Tórtinshiden, Atyraý qalasynda nemese Atyraý oblysynda tańdaǵan mamandyǵy boıynsha resmı jumys ótili bolǵany jón. Besinshiden, baǵdarlamaǵa erli-zaıypty jastardyń bireýi ǵana qatysa alady.
Depozıtterinde qarajat jınaqtap júrgen bank salymshylary jaqyn arada memleketten qomaqty kómek – 20 paıyzdyq syılyqaqyǵa qol jetkize alady. Syılyqaqy 200 aılyq eseptik kórsetkish nemese 612 600 teńgeden aspaıtyn jınaq somasyna qosylady. Aqshalaı eseptegende, memlekettik syılyqaqynyń eń joǵary somasy 2022 jyldyń sońynda 122 520 teńgege teń.