Atyraý jáne Mańǵystaýdy Kókjıde qorynan sýmen qamtýdy jedeldetý qajet - Álıhan Smaıylov
Keńes barysynda Úkimet basshysy bıylǵy 7 aıdyń qorytyndysy boıynsha óńirde negizgi ekonomıkalyq kórsetkishterdiń óskenin aıtty. Atap aıtqanda, ónerkásip óndirisiniń kólemi 1,2%-ǵa, al qurylys salasy 15%-ǵa artqan.
Premer-Mınıstr atap ótkendeı, «Qýatty óńirler – el damýynyń draıveri» ulttyq jobasy aıasynda Atyraý oblysyndaǵy 29 aýyldyq eldi mekeninde jalpy somasy 11 mlrd teńgeden asatyn ınjenerlik ınfraqurylym men kúre joldardy jańǵyrtý boıynsha 41 joba iske asyrylyp jatyr.
«Oblys ákimdigi óńirdiń damýy men áleýmettik máselelerin sheshýge bólingen qarajatty tıimdi jáne utymdy ıgerýi qajet», - dedi Álıhan Smaıylov.
Azyq-túlik tapshylyǵy men onyń baǵasynyń negizsiz ósýine jol bermeý jónindegi jumysty jalǵastyrýǵa nazar aýdaryldy. Bul baǵytta ákimdik saýda jelilerimen jumys isteý kezinde «aınalym shemasyn» belsendi túrde qoldanyp, basqa óńirlerden erte pisetin kókónisterdi jetkizýge tikeleı sharttar jasasýy qajet.
Úkimet basshysynyń aıtýynsha, oblys ákimdiginiń taǵy bir basty mindeti – óńirlik ekonomıkany ártaraptandyrý. Bul rette 2024 jylǵa deıin 406 mlrd teńgege 260 jańa ınvestıtsııalyq jobany iske qosý josparlanyp otyr. 2,7 trln teńgege taǵy 114 joba ázirlenip jatyr.
«Olardy iske asyrý nátıjesinde qosymsha jumys oryndary paıda bolady. Barlyq josparlanǵan jobalardy ýaqtyly iske qosyp, jańa jobalardy sapaly pysyqtaý qajet», - dedi Premer-Mınıstr.
Keńes qorytyndysy boıynsha Úkimet basshysy taǵy da birqatar tapsyrma berdi:
- Atyraý jáne Mańǵystaý oblystaryn Kókjıde jerasty tuşy sý qorynan sýmen jabdyqtaý jobasyn iske asyrýǵa tehnıkalyq qujattama daıyndaýdy jedeldetý;
- Atyraý qalasynyń oń jaǵalaýyndaǵy kárizdik jelilerdi rekonstrýktsııalaý jobasyn túzetýdi jedeldetý;
- «Atyraý - Reseı Federatsııasynyń shekarasy» avtojolyn rekonstrýktsııalaý jónindegi jumysty jedeldetý;
- óńirde jol jóndeý jumystaryna bıtým men basqa da materıaldardy qajetti kólemde jetkizý máselesin pysyqtaý;
- balalarǵa mektepke deıingi tárbıe berý, úsh aýysymmen oqytatyn mektepterdi azaıtý jáne mektepterde jańa oryndar qurý boıynsha jumysty jandandyrý;
- Atyraýda jańa onkologııalyq dıspanser ashý máselesin qaraý jáne Atyraý oblystyq perınataldyq ortalyǵyna kúrdeli jóndeý júrgizý, tolyq jaraqtandyrý máselesin pysyqtaý;
- «TShO»-nyń óndiristik obektilerinen bosatylatyn qyzmetkerlerdi jumysqa ornalastyrý boıynsha sharalar qabyldaý.
«Keshe Memleket basshysy Qazaqstan halqyna Joldaýynda óńirlerdiń de, jalpy eldiń de áleýmettik-ekonomıkalyq damýyna eleýli serpin beretin naqty qadamdardy belgiledi. Qoıylǵan mindetterdi oryndaý úshin barlyq kúsh-jigerimizdi salýymyz kerek, sondaı-aq qoǵam kóteretin problemalyq máselelerge jedel den qoıyp otyrý kerek», - dep túıindedi Álıhan Smaıylov.
Foto: primeminister.kz