Atyraý TJD jer silkinisi týraly aqparatty joqqa shyǵardy

ASTANA. QazAqparat - Atyraý oblystyq tótenshe jaǵdaılar departamenti óńirdegi jer silkinisi jónindegi málimetti teriske shyǵardy, dep habarlaıdy Atyraý oblystyq óńirlik kommýnıkatsııalar qyzmeti.

Atyraý  oblystyq tótenshe jaǵdaılar departamenti ókilderimen  brıfıng ótti. Departament basshysynyń orynbasary Zamır Berdashevtiń  aıtýy boıynsha,  3 sáýir kúngi Atyraý  oblysy aýmaǵyndaǵy  magnıtýdasy 3,45mb   jer silkinisi boldy degen aqparat shyndyqqa janaspaıdy.

«Biz kúni keshe QR Bilim jáne ǵylym mınıstrligine qarasty «Seısmologııalyq baqylaý jáne zertteý ulttyq ortalyǵy » AQ-nan málimet alǵan bolatynbyz.

Atyraý oblysy aýmaǵy boıynsha kórsetilgen mejedegi jer silkinisi bolmaǵanyn, aýmaqta  eshqandaı  jer dúmpýi tirkelmegenin málimdedi. Biz kúndelikti  QR  TJK, kórshiles RF Astrahan oblysynyń seısmologııalyq  jaǵdaıy jóninde málimet alyp otyramyz. Alaıda,  «Geofızıkalyq zertteýler ınstıtýty » RMK keltirgen málimet bizge túsken joq, - deıdi  Zamır  Berdashev.

Búgingi tańda Tótenshe jaǵdaılar departamentiniń málimetinshe, Atyraý oblysy boıynsha seısmologııalyq qaýipti aımaq  bolyp - Atyraý qalasy, Aqqystaý selosy, Mahambet jáne Inder aýdany bolyp tabylady.       

Eske sala keteıik, Qazaqstan ulttyq derekter ortalyǵy 2018 jyldyń 3 sáýirinde Astana ýaqytymen 15 saǵat 11 mınýtta Atyraý oblysynda jer silkindi dep habarlaǵan bolatyn.